Igisirikare ca Kongo, FARDC, kivuga ko abantu umurwi wa M23 waraye uhaye u Rwanda, uvuga ko ari abarwanyi ba FDLR barwanya ubutegetsi bw’u Rwanda, ari irementanya n’umukino ugamije kugitesha agaciro.
Abo igisirikare c’u Rwanda ceretse abamenyeshamakuru, bose hamwe ni 20. Muri bo, harimwo umugabo u Rwanda rwemeza ko ari Ezéchiel Gakwerere, “umusirikare mukuru w’ipete rya jenerali de Brigade, akaba yahoze ari umu koloneli mu ngabo za kera z’u Rwanda. Uyu mugabo w’imyaka 61, ku bw’igisirikare c’u Rwanda, yari amaze imyaka 30 muri Kongo.”
Itangazo ryasohowe n’igisirikare ca Kongo rigira riti: “ Igikorwa cabaye ni ububisha ata kindi bugamije atari ukudutesha agaciro no kuturemeka inkono ishushe. Ni kandi umwe mu mikenyuro ya Reta y’u Rwanda, yo kwisigura ku gituma ingabo zayo ziri mu buseruko bwa Kongo.”
Igisirikare ca Kongo muri iryo tangazo kibandanya kigira kiti: “ Ubutegetsi bw’u Rwanda bufise uburambe mu kurementanya, bwafashe abarwanyi ba FDLR, bamaze igihe mu minwe yabwo, bubambika impuzu nshasha z’igisirikare cacu, kugira ngo bwemeze ko ari aba FDLR bafatiwe muri Kongo.”
Ku wa gatandatu, abo igirikare c’u Rwanda cerekanye bose bari bambaye imyambaro y’igisirikare ca Kongo. U Rwanda ntaco ruravuga kw’itangazo rya Kongo.
U Rwanda akatari gake, rwavuze ko impamvu ruri muri Kongo ari ahanini uruhigi rw’abarwanyi b’umurwi wa FDLR, washinzwe n’abagirizwa kuba inyuma ya Jenoside yakorewe abatutsi mu Rwanda mu 1994. (AFP)
Forum