Mu Bushinwa, inkubiri yo kurwanya ruswa imaze gukura abatari bake mu bayobozi b’inzego z’igisirikare ku myanya bari bafite.
Abasirikare bakuru bagera kuri 12 ntibazaboneka mu ikoraniro rihuza abategetsi bakuru mu nzego za politike n’iza gisirikare riteganijwe mu cyumweru gitaha.
Mbere y’iri koraniro riteganijwe kuva taliki enye uku kwezi, ubutegetsi bwatangaje ko Tan Ruisong wahoze ukuriye kompanyi ya leta, Aviation Industry Corporation of China, ikora indege n’ibindi bikoresho bya gisirikare, na we yiyongeye ku rutonde rw’abakurikiranyweho ruswa.
Akanama gashinzwe iby’imyitwarire no kurwanya ruswa katangaje ko uyu mugabo yaba yarakiriye ruswa itubutse.
Abasesenguzi baravuga ko uku guhiga bukware abavugwaho kwakira ruswa ari uburyo Perezida Xi Jinping yaba arimo gukoresha kugirango yiheshe igitinyiro no kuyobokwa mu bagize inzego nkuru za gisirikare n’izubutegetsi, kurusha uko byaba ari igikorwa nyirizina cyo kurwanya ruswa.
Forum