Uko wahagera

Prezida Trump na Zelenskyy Bateranye Amajambo


Prezida Donald Trump wa Reta zunze ubumwe za Amerika na Volodymyr Zelenskyy wa Ukraine
Prezida Donald Trump wa Reta zunze ubumwe za Amerika na Volodymyr Zelenskyy wa Ukraine

Uguterana amajambo akomeye ni ko kwaranze inama yabereye ku ngoro kwa Prezida wa Amerika, kuri uyu wa gatanu, hagati ya Prezida Donald Trump, na Prezida wa Ukraine, Vlodomyr Zelenskyy.

Ayo majmbo yatumye haba amakenga ku vyerekeye imfashanyo ya Amerika kuri ico ihugu muri kazoza.

Mu kwagiriza Prezida Zelenskyy ko aterekanye ko ashima bihagije imfashanyo Amerika yahaye igihugu ciwe, Prezida Trump, n’icegera ciwe, JD Vance, baradugije amajwi, igihe c’iyo nama, bagiriza Zelenskyy ko ari intambamyi y’amasezerano y’amahoro.

Prezida Trump yagize ati: :"Ntuhagaze neza muri iki gihe. Uriko ukina n’ibishobora kuvamwo ingwano ya gatatu y’isi yose."

Prezida Trump yavuze ko Zelensky adasa n’umuntu ashima.

Mu gusubiza Prezida Zelenskyy yavuze ko ashima Amerika n'Abanyamerika kandi ko yipfuza amahoro.

Muri iyo nama, icegera ca Prezida Trump, JD Vance, na we nyene yaragirije Zelenskyy ko atariko aha icubahiro Abanyamerika bamwakiye. Vance yabajije Prezida Zelenskyy niba yoba yarigeze ashima na rimwe.

Habaye uguterana amajambo hagati ya Prezida Volodymyr Zelenskyy, Prezida Donald Trump na Visi Prezida JD Vance
Habaye uguterana amajambo hagati ya Prezida Volodymyr Zelenskyy, Prezida Donald Trump na Visi Prezida JD Vance

Abitegereza ibintu n’ibindi batangaje ko kubona umukuru w’igihugu kiri mu ngwano yifatirwa ku gahanga n’abamwakiye, ari ibintu bitari bwibonekeze mu mateka yo mu bihe vya vuba y’abaprezida ba Amerika.

Uguterana amajambo akomeye hagati ya Prezida Trump na Prezida Zelenskyy, kwamaze iminuta cumi mu biro vy'ingoro ya prezida. Vyerekanye ukutumvikana gukomeye hagati y’abo bategetsi bompi imbere y’abamenyeshamakuru bariko bafata amajwi n’amasanamu..

Prezida Trump yabwiye Zelesnkyy ko afise guhitamwo kugirana amasezano "na twe canke ukisanga uri wenyene. Urugamba uzorurwana wenyene. Sinibaza ko azoba ari urugamba rworoshe na gato kuri wewe."

Uguterana amajambo akomeye hagati ya Prezida Trump na Prezida Zelenskyy kwatumye haba impungenge zikomeye ku vyerekeye gushika ku nyishu iciye mu mahoro ku ntambara muri Ukraine.

Vyateye impungenge zikomeye nshasha kandi ku mugabane w’Ubulaya, aho abategetsis baho bamaze indwi zitari nke bagabisha Prezida Trump ku nyifato ya Prezida w’Uburusiya, Vladimir Putin muri kahise, n’imigambi ashobora kuba afise muri kazoza.

Inyuma y’uko abonanye na Prezida Zelenskyy, Prezida Trump, mu butumwa ku rubuga rwiwe, Truth Social, yanditse ko Zelensky ashobora kuzogaruka mu biro vyiwe, igihe azoba yiteguriye amahoro. Yatangaje ko we na Zelenskyy bagiranye ibiganiro ngirakamaro mu biro vyiwe.

Prezida Trump yavuze ko yasanze Prezida Zelenskyy atiteguriye amahoro. Yongeye asigura ko Zelenskyy atubashe Reta Zunze Ubumwe za Amerika bifatiye ku kugene yifashe mu biro vya perezida.

Forum

XS
SM
MD
LG