Prezida wa Ukraine, Volodymyr Zelensky, ariko arabonana na Prezida wa Reta Zunze Ubumwe za Amerika mu biro vyiwe. Abonanye na Prezida Trump mu gihe gihambaye cane kuri Ukraine.
Bitegenaijwe ko Zelensky n’abamuherekeje batera igikumu ku masezerano akomeye yerekeye ubutunzi na Amerika. Ayo masezerano yotuma ivyo bihugu bikorera hamwe mu kiringo c’imyaka iri imbere.
Amasezerano hagati ya Amerika na Ukraine, abonwa nk’intambwe mu nzira yo guhagarika ingwano imaze imyaka 3 muri Ukraine. Hisunzwe amasezerano y’intangamarara,
itororkanirizo ry’amakuru ryo muri Amerika, Amerika na Ukraine bizotunganya ikigega c’imitahe rusangi, aho Ukraine izoshiramwo ibice 50 kw’ijana vy’amafranga izoronka muri kazoza azoba avuye mu matungo kama ari musi y’ubutaka. Amasezerano anonosoye kurushiriza ku bijanye no gushiraho ico kigega azotunganywa igihe ay’intangamarara azoba yateweko igikumu.
Prezida wa Amerika, Donald Trump, umurepubkika, yatangaje ko ayo masezerano ari akaryo ku gihugu ca Ukraine ko kuriha imfashanyo y’amafaranga Amerika yagihaye mu gihe c’ingwano, ku ntwaro y’uwo yasubiriye, Prezida Joe Biden.
Nibaza ko mfise imigenderanire myiza na Prezida Zelensky, tugiye gupfundika amasezerano, tugiye kujayo, tugiye no kwimba, turakeneye ubutare bw'akataraboneka, turabusie muri Amerika, ariko ntibukwiye
Muri iki gihe Abanya-Ukraine batari bake barafise ubwoba ko amasezerano aganiwe gihutihuti, cane cane ayahebera Uburusiya ibintu vyinshi busaba, azorekurira ico gihugu kwongereza inguvu zaco mu ntumbero yo gukora ibitero kuri Ukraine muri kazoza inyuma y’uko ingwano ihari muri iki gihe ihagaze.
Prezida wa Ukraine, Volodymyr Zelensky, aguma yemanga ko uguhumurizwa kw’igihugu ciwe ku vyerekeye umutekano bitegerezwa kujana n’amasezerano ayo ari yo yose aha uburenganzira Amerika ku masoko kama yo mu gihugu ciwe.
Ku musi wa gatatu w’iyi ndwi, Zelensky yatangaje ko amasezerano na Amerika ashobora kuba arimwo ingingo zihumuriza igihugu ciwe ku vyerekeye umuetkano waco muri kazoza. Yamara Prezida wa Amerika, Donald Trump, ntiyari yemeza ku buryo bugaragara ko igihugu ciwe kizokingira umutekano wa Ukraine. Prezida Trump, yabwiye abamenyeshamakuru muri iyi ndwi ko atamuhango ashobora gutanga ko Amerika izokingira umutekano wa Ukraine. Trump yavuze ko Ubulaya ari bwo buzobikora.
Ni incuro igira gatatu Prezida wa Ukraine, Volodymyr Zelensksy, agendera ibiro vya Prezida wa Amerika. Yamara urugendo yagize incuro zine imbere yaho hari ku ntwaro ya Prezida Joe Biden. Bitegekanijwe ko abonana kandi n’abashingamateka ba Amerika mu gihe ari i Washington. (AP)
Forum