Umushikiranganji wa mbere w'Ubwongereza, Keir Starmer, yatumiye abategetsi batari bake b'ibihugu vy'Ubulaya n'ishirahamwe ry'ubumwe bw'Ubulaya mu nama yategekanije kuri uyu w'imana. Ni inama yo kwihweza ingingo zofatwa kuri Ukraine no ku bijanye n'umutekano.
Imbere y’iyo nama Starmer azovugana kw’itelefone n’abategetsi b’ibihugu vyo mu karere k'Ubulaya kegereye Uburusiya, imbere y’uko yakira prezida wa Ukraine, Volodymir Zelensky, mu biro vyiwe.
Ibiro vy'umushikiranganji wa mbere w'Ubwongereza vyatangaje ko muri iyo nama abategetsi b’ibihugu vy’Ubulaya bazokwerekana, ata n’umwe avuyemwo, ko bashigikiye bivuye inyuma amahoro n’amasezerano bizorama, bizokwubahiriza imbibe n’umutekano vya Ukraine muri kazoza.
Abategetsi bo ku mugabane w’Ubulaya barimwo n’ab’Ubufaransa, Ubudagi, Danemarke, Ubutaliyano hamwe na Turkiya, ab’ishirahamwe OTAN n’ishirahamwe ry’Ubumwe bw’Ubulaya baratumiwe mu nama yo kuri uyu w’Imana wimirije, i Londres.
Inyuma y’uko abonanye kuri uyu wa kane na Prezida wa Amerika, Donald Trump, i Washington, Starmer yatumiye kandi mu nama yo ku musi w’Imana abategetsi
b’bihugu vy’Ubuholande, Noruveje, Polonye, Esipanye, Finlande, Ubusweda, Republika ya Ceke na Romaniya. (AFP)
Forum