Umushikiranganji wa mbere wa Etiyopiya, Abiy Ahmed, kuri uyu wa kane, yagendeye Somaliya. Yabonanye na prezida wa Somaliya, Hassan Sheikh Mohamed, ku murwa mukuru, Mogadisho.
Abiy Ahmed yashitse i Mogadisho mu gihe inteko za Somaliya, zishigikiwe n’inteko zijejwe gucungera umutekano z’ishirahamwe ry’Ubumwe bwa Afrika zakomeje umutekano ku kibuga c’indege mpuzamakungu ca Aden, no kw’ibarabara rijana ku biro vya Prezida wa Somaliya.
Abamenyeshamakuru b’Ijwi rya Amerika batangaje ko amabendera ya Etiyopiya yariko arahungabana ku kibuga c’indege mpuzamakungu co ku murwa mukuru, Mogadisho. Inyuma y’uko Abiy abonanye na Prezida Hassan Sheikh Mohamed mu biro vyiwe, abo bategetsi bompi basohoreye hamwe itangazo ryemeza ko biyemeje gukomeza ugukorana hagati y’ibihugu vyabo, ku nyungu rusangi yavyo.
Iryo tangazo rivuga ko urugendo rwa Abiy Ahmed rwakwirikiye ibiganiro vyabaye hagati y’ibihugu vyompi mu kiringo c’amezi makeyi arangiye. Rivuga kandi ko ibihugu vyompi vyiyemeje gukomeza kurushiriza imigenderanire hagati yavyo. Risigura kandi ko Etiyopiya na Somaliya ari ibihugu bifise kazoza kamwe, bishaka umutekano n’iterambere mu karere. (VOANEWS)
Forum