Inteko z'Uburundi zizova muri Somaliya, inyuma y'uko Reta y'ico gihugu n'iy'Uburundi bitumvikanye ku gitigiri c'abasirikare bazoba bari mu nteko nshasha z'ishirahamwe ry'ubumwe bwa Afrika zizwi kw'izina rya AUSSOM.
Reta ya Somaliya n’ishirahamwe ry’ubumwe bwa Afrika vyarumvikanye ku bitigiri vy’inteko ibihugu vyemeye kuzotanga zizoba ziri mu nteko nshasha z’iryo shirahamwe.
Hari inyuma y’indwi zitari nke z’ukutumvikana hagati ya Somaliya na Etiyopiya, mu nyuma yaho hagati ya Somaliya n’Uburundi ku gitigiri c’inteko zova muri ivyo bihugu vyompi.
Umutegetsi w’ishirahamwe ry’ubumwe bwa Afrika, atashatse ko izina ryiwe rimenyekana, yabwiye Ijwi rya Amerika ko inteko z’Uburundi ziri muri Somaliya kuva mu mwaka w’i 2007 zizova muri ico gihugu. Ni inyuma y’uko amareta y’ivyo bihugu vyompi adashoboye kwumvikana ku gitigiri c’inteko zova mu Burundi.
Yamara hari umutegetsi wundi w’ishirahamwe ry’ubumwe bwa Afrika yabwiye Ijwi ry'Amerika ko ibiganiro ku vyerekeye abasirikare b’Uburundi bashirwa mu nteko nshasha z’iryo shirahamwe zokorera muri zo bikibandanya.
Yamenyesheje ko hamwe abasirikare b’Ubrundi bova muri Somaliya, vyogira ingaruka zikomeye cane za politike n’amafaranga kw’ishirahamwe ry’ubumwe bwa Afrika.
Vyongeye yavuze ko hakiri ikibazo gikomeye cane kijanye n’amafaranga agenewe inteko za AUSSOM kitaratorerwa inyishu. Uwo mutegetsi yatangaje ko Uburundi bwatanze vyinshi, ko kubera izo mvo impungenge zabwo zikwiye kwumvirizwa.
Amasezerano mashasha ategekanya abasirikare 4,500 baturutse muri Uganda, 2,500 muri Etiyopiya, 1,520 muri Djibouti, 1,410 muri Kenya n’i 1,091 mu gihugu ca Misiri.
Hari kandi abapolisi amajana n’amajana bazova muri Nijeriya, Sierra Leone na Misiri bazoba bari ku murwa mukuru wa Somaliya, Mogadisho, no mu bisagara vya Jowhar na Baidoa.
Mu kiringo c’amezi atari make, Somaliya na Etiyopiya ntivyumvikanye ku vy’uko ico gihugu cogira uruhara mu nteko z’ishirahamwe ry’ubumwe bwa Afrika. Hari inyuma y’uko imigenderanire hagati y’ivyo bihugu vyompi itosekaye bivuye ku masezerano Etiyopiya yagiranye n’intara ya Somaliland yiyonkoye kuri Somaliya. Ayo masezerano yarekurira Eityopiya gushobora gushika kw’ibahari yitiriwe Ubuhindi.
Muri iyi ndwi, abategetsi ba Somaliya na Etiyopiya barateye igikumu ku masezerano arekurira inteko za Etiyopiya kugira uruhara mu nteko nshasha z’ishirahamwe ry’ubumwe bwa Afrika zizokorera muri Somaliya. (VOANEWS)
Forum