Ikibazo c'amadeni cashitse ku rugero ruri hejuru cane mu bihugu biri mu nzira y'amajambere. Iyo nkuru yatangajwe n'ishami ry'ishirahamwe ONU rijejwe iterambere, PNUD
PNUD yagabishije ko amadeni y’ibihugu bikenye kurusha ibindi kw’isi yashitse ku rugero ruri hejuru cane. Iryo shirahamwe ryavuze ko amafaranga ivyo bihugu bikoresha kugira birihe amadeni vyafashe agira ingaruka zikomeye ku migambi y’iterambere.
Kubera ivyo, ryatangaje ko amasezerano mashasha yerekeye korohereza amadeni ibihugu bikenye yohuza impande zose zirimwo n’abatanga amadeni bose, akwiye gupfundikwa.
Mu cegeranyo caryo, PNUD ivuga ko kuriha inyungu ku madeni vyarenze ibice 10 kw’ijana vy’amafaranga amareta y’ibihugu 56 biri mu nzira y’amajambere, vyinjiza. Igitigiri c’ivyo bihugu ciyongeye hafi y’incuro zibiri, umuntu abigereranije no mu myaka cumi irangiye.
Ico gisata ca ONU casohoye ico cegeranyo mu gihe abashikiranganji bajejwe ikigega n’abayobozi b’amabanki makuru b’umurwi G20 ugizwe n’ibihugu biteye imbere n’ibiriko biratera imbere mu butunzi kurusha ibindi kw’isi, batanguye inama mu gihugu ca Afrika y’epfo. (REUTERS)
Forum