Abo bimukira barungitswe hisunzwe ivyaha bikomeye cane bakoze ku butaka bw'Amerika. Ivyo bibaye imisi mikeyi, inyuma y’aho iyo kampi ikuriwemwo abayihoramwo.
Umutegetsi wo mu bushikiranganji bwo kwivuna abansi bwa Amerika yavuganye n’Ijwi rya Amerika, yemeje ko indege y’ingwano itwara imizigo yo mu bwoko bwa C-130, yari itwaye abimukira, yavuye mu kibanza ca gisirikare ca Fort Bliss muri Reta ya Texas, ishika mu kibanza ca Guantanamo Bay ku musi w’Imana, urangiye.
Umutegetsi agira kabiri wo mu bushikiranganji bwo kwivuna abansi muri Amerika yatangaje ko abimukira 17 bageramiye bikomeye umutekano w’abanyagihugu kubera ivyaha bikomeye cane bakoze. Yavuze ko kubera izo mvo bapfungiwe mu kibanza ca Guantanamo Bay. Abo bategetsi bompi ntibashatse ko amazina yabo amenyekana igihe bavugana n’Ijwi rya Amerika, ku bikorwa vyo kwirukana abo bantu.
Abo bimukira bagirizwa ivyaha bikomeye cane, bajanywe mu kibanza ca Guantanamo Bay mu gihe vyari bitegekanijwe ko umushikiranganji ajejwe kwivuna abansi wa Amerika, Pete Hegseth agendera ico kibanza kuri uyu wa kabiri, kugira yihweze utwigoro tw’igisirikare two gushigikira igikorwa categetswe na Prezida Donald Trump co kwirukana abimukira benshi bari ku butaka bwa Amerika batabifitiye uburenganzira. (VOANEWS)
Forum