Abahitanwe n'iyo ndwara ni abakomoka mu buraruko bushira uburengero bwa Repubulika ya demokrasi ya Kongo.
Muri rusangi bifata amasaha 48 kugira umuntu abe yapfuye inyuma y’uko yerekanye ibimenyetso vy’iyo ndwara nk’uko vyatangajwe na Serge Ngalebato, umuyobozi w’ibitaro vy’ahitwa Bikoro. Yatangaje ko ivyo ari vyo biteye impangenge nyinshi cane.
Iyo ndwara yatanguye kwiyadukiza muri Repubulika ya demokarsi ya Kongo, kw’italiki 21 y’ukwezi kwa mbere kw’uyu mwaka. Abaganga bakorera muri ako karere hamwe n’ishirahamwe ryita ku magara y’abantu kw’isi, OMS, bivuga ko abantu 419 ari bo banduye iyo ndwara itazwi, harimwo 53 bamaze gupfa.
Hisunzwe amakuru yatangajwe n’ibiro vy’ishirahamwe OMS, ku mugabane wa Afrika, ukwiyadukiza ubwa mbere kw’iyo ndwara mu gisagara ca Boloko kwatanguye inyuma y’uko abana batatu bariye agahungarema, hanyuma bitama Imana mu kiringo c’amasaha 48 inyuma y’uko berekanye ibimenyetso vyo kuyorwa amaraso.
Hamaze igihe hari impungenge ku vyerekeye indwara zishobora gutandukira abantu zivuye mu bikoko mu bice aho abantu bakunda kurya ibikoko vyo mw’ishamba. (AP)
Forum