Umushikiranganji ajejwe ikigega w'Ubudagi, Joerg Kukies, yatangaje ko Uburusiya butazosubira kwemererwa mu murwi G7 w'ibihugu biteye imbere kurusha ibindi kw'isi, nk'uko Prezida wa Amerika, Donald Trump yabisavye.
Joerg Kukies yavuze ko ibihugu bigize umurwi G7 vyiyamirije mu buryo butomoye ibitero vy’Uburusiya muri Ukraine, cane cane ku musi wo kwibuka imyaka itatu irangiye ico gihugu gitanguye ibitero. Yavuze ko ivyasabwe na Prezida Trump vy’uko Uburusiya bwosubira kwemererwa mu murwi G7, bitazoshigikirwa n’ibihugu vyose bigize uyo murwi.
Ukugene ubutunzi bwifashe muri iki gihe mu makungu ni co kibazo nyamukuru kizoshimikirwako mu nama y’abashikiranganji bajejwe ikigega b’ibihugu bigize umurwi G7.
Umushikiranganji w’Ubudagi ajejwe ikigega, kuri uyu wa kabiri, yagiye mu gisagara ca Cape Town, muri Afrika y’epfo, mu nama y’abashikiranganji bajejwe ikigega b’umurwi G20 w’ibihugu biteye imbere n’ibiriko biratera imbere mu
vy’ubutunzi kurusha ibindi kw’isi. Yamara umushikiranganji ajejwe ikigega wa Amerika, Scott Bessent, ntiyagiye muri iyo nama.
Umushikiranganji ajejwe ikigega w’Ubudagi yatangaje ko amakungu akeneye gusubira mu nzira y’iterambere mu vy’ubutunzi, kandi ko igihugu ciwe gifise ibitari bike gitegerezwa gukora. Yasiguye ko intambara y’ubudandaji hagati ya Amerika n’umugabane w’Ubulaya ishobora kwirindwa mu gihe impande zompi zipfuza kuganira, kandi ata ruhande na rumwe rwokura inyungu mu gutangura intambara y’ubudandaji. (REUTERS)
Forum