Ingwano muri Republika ya republika ya demokrasi ya Kongo imaze guhitana abantu 7,000 kuva mu kwezi kwa mbere kw'uyu mwaka nk'uko bitangazwa n'umushikirangaji wa mbere w'ico gihugu.
Mu bapfuye harimwo abarwanyi n’abasivile. Umushikiranganji wa mbere wa Kongo, Judith Suminwa, yabitangaje mu nama y’akanama kajejwe agateka ka muntu i Geneve mu Busuwise, kuri uyu wa mbere.
Yasiguye ko abagera ku 3,000 bishwe mu gisagara ca Goma, mu gihe abagera ku 450,000 batagira aho bakika umusaya inyuma y’uko amakambi barimwo asambuwe. Judith Suminwa yavuze ko n’iyo ikibazo cerekeye iyubahirizwa ry’imbibe za Kongo kitatorerwa inyishu, ibintu bishobora kuyanzara muri ico gihugu.
Muri iyo nama yo mu Busuwise, umunyamabanga mukuru w’ishirahamwe ONU, Antonio Guterres, yatangaje ko agateka ka muntu kw’isi kageramiwe bikomeye.
Yavuze ko amabi ateye agahinda ariko abera muri Republika ya demokrasi ya Kongo. Abantu bagera ku 40,000 barahungiye mu Burundi, kimwe mu bihugu 9 bisangiye imbibe na Kongo. Bahunze ingwano mu ndwi zibiri zirangiye, nk’uko vyatangajwe n’ishirahamwe ONU ku musi wa gatanu w’indwi irangiye.
Umushikiranganji wa mbere wa Kongo yagabishije ko umutekano utera umera nabi kurishiriza mu gihugu ciwe kubera intambara n’umurwi M23 hamwe n’iyindi mirwi yitwaje ibirwansiho bishobora gukwiragira mu bihugu bihana imbibe na Kongo.
Yamenyesheje ko bishobora kugeramira umutekano w’ivyo bihugu. Yaboneyeko gusaba amakungu gufatira ibihano biomeye u Rwanda. (REUTERS)
Forum