Umushikiranganji wa mbere mushasha w’Ubudagi Friedrich Merz, aherutse gutsinda amatora mu gihugu c'Ubudagi, kuri uyu wa mbere, yatangaje ko azorondera kugirana imigenderanire myiza na Reta Zunze Ubumwe za Amerika ku ntwaro ya Prezida Donald Trump.
Yamara yavuze ko yiteguye mu gihe ibintu bitogenda neza na gato hagati y'ibihugu vyompi.
Umushikiranganji wa mbere mushasha w’Ubudagi, Friedrich Merz, atsimbataye ku mico n’imigenzo vya kera, yatangaje ko afise icizere ko igihugu ciwe gishobora kwumvisha Abanyamerika ko kugirana imigenderanire myiza biri mu nyungu y’impande zompi.
Yabivuze mu kiganiro yahaye abamenyeshamakuru, umusi umwe inyuma y’uko urunani rwiwe CDU/CSU rurangije mu kibanza ca mbere mu matora rusangi yabaye kuri uyu w’Imana mu Budagi.
Yamara uwo muyobozi Merz yatangaje ko igihe cose umuntu ategerezwa kwitegura mu gihe ibintu bitogenda neza na gato. Yagabishije ko ibimenyetso vyose baronka bivuye muri Amerika vyerekana imigambi y’ico gihugu yo gukorana n’umugabane w’Ubulaya iriko itera igabanuka.
Yongeye avuga ko, kuri uyu w’Imana, yavuganye mu kiringo kirekire kw’i telefone na prezida w’Ubufransa Emmanuel Macron. Hari mu gihe Prezida Macron yariko aja i Washington kubonana na Prezida wa Amerika, Donald Trump.
Merz yatangaje ko bavuganye ku bibazo Macron ashaka kuvuganako na Prezida Trump. Yamenyesheje ko we na Prezida Macron bumvikanye kuvyo bompi bashaka kuvuga ku migenderanire hagati ya Amerika n’umugabane w’Ubulaya. (AFP)
Forum