Reta zunze ubumwe z’Amerika na Ukraine bitangaza ko amasezerano y’ubutare bw’agaciro Amerika yasavye ko Ukraine iyiha nk’indishi y’ama miriyaridi menshi y’imfashanyo imaze kuyiha kugira yivune intambara y’Uburusiya, ari mu kuboneka.
Prezida wa Ukraine Volodymyr Zelenskyy mu kiganiro yagiranye n’abamenyeshamakuru I Kiev, yababwiye ko zimwe mu ngingo ziri mu nteguro y’ayo masezerano, zivuga ko kw’idorari rimwe, Amerika yahaye Ukraine, ico gihugu kizoyisubiza idorari zibiri. Nta vyinshi bindi Prezida wa Ukraine yavuze ku kungene igihugu ciwe kizoriha Amerika.
Intumwa idasanzwe ya Amerika Steve Witkoff, yabwiye tereviziyo nyamerika, CNN, ko Ukraine na Amerika bishobora gusinya ayo masezerano yasabwe na Prezida Donald Trump mu ndwi iza. Ntiyigeze avuga ibizoba biri muri ayo masezerano.
Witkoff yavuze ko ibihugu vya Buraya vyahaye imfashanyo Ukraine, vyoba vyayitanga bibanje kwumvikana ko Ukraine izobiriha, ariko ko Amerika atariko vyari vyaragenze. Witkoff ati: “ Prezida Donald Trump yasanze bitumvikana ingene Amerika yoha imfashanyo zingana ukuraho Ukraine, ivyo bihugu bitumvikanye ingene izoziriha.”
Prezida wa Ukraine yari yabanje kwanka ivyasabwe na Amerika, avuga ko adashobora kwemera gusinya amasezerano ashira mu kaga “ Abanyagihugu ba Ukraine barimwo abazovuka mu myaka irenga 200 iri imbere.”
Yavuga ko Ukraine itigeze ifata amafaranga Amerika yayihaye nk’ideni, agira ati: “ Twaragiranye amasezerano n’uwahoze ari prezida wa Amerika, Joe Biden hamwe n’inama nshingamateka, kandi ndashimira izo mpande zibiri. Ivyabaye kwari ukudushigikira mu kuduha imfashanyo. Imfashanyo si ideni. Kumbure ko hari abatavyishimiye, bibaza ko atariko vyari bikwiye kugenda. Ariko amasezerano yaratomora ko ari ingabire. Ntitwigeze tubifata nk’ideni.”
Ubutare bw’agaciro bwa Ukraine Prezida Donald Trump asaba ko Amerika igirako uruhara, ahanini bwifashishwa mu guhingura ibikoresho bitandukanye vyifashishwa mu buhinga bwa none.
Ikigo Kiel co mu Budagi gikorera mu gisata c’ubutunzi, kivuga ko Amerika iza imbere mu bihugu bimaze guha amafaranga menshi Ukraine kuva Uburusiya butangura kuyigabako ibitero. Ico kigo kivuga ko imaze gutanga amamiriyaridi 128 yo gufasha mu vya gisirikare n’ubutabazi. Aya mafaranga, ari hasi y’ayamaze gutangwa n’ibihugu 27 vyo mu muryango w’ubumwe bwa Buraya.
Ejo ku wa mbere, intambara Uburusiya bwatanguje muri Ukraine izoba yujuje imyaka 3 itanguye ( REUTERS)
Forum