ONU Isaba u Rwanda Kuvana Abasirikare Bayo muri Kongo

Ubwongereza bwataye ivyatsi intambwe umurwi wa M23 urwanya ubutegetsi bwa Kongo “ ubandanya gutera mu buseruko bw’ico gihugu”, bwongera busaba ko ubusugire n’ubwigenge bwa Kongo vyubahirizwa, bitagenze uko, impande zitandukanye zerwa n’ikibazo ca Kongo zigafatirwa ibihano.

Biciye muri videwo yashize ku rubuga rwiwe rwa X, umushikiranganji ajejwe imigenderanire y’Ubwongereza n’ayandi makungu David Lammy, yagize ati: “ Ibiriko bibera mu buseruko bwa Kongo si ivyo kwihanganira. Hategerezwa kuboneka agahengwe k’intambara. Dusavye ko impande zose zorohereza abashaka guha ubufasha ababukeneye muri kongo. Ubwongereza buzoshikira uwo wese afise ishaka ryo guheza ino ntambara, bufatire ibihano ababandanya kuba imbarutso yayo.”

David Lammy yasavye kandi ko ibihugu vya Afurika vyokora ibishoboka vyose amahoro akaboneka muri Kongo, yongera avuga ko yavuganye na Prezida w’u Rwanda Paul Kagame hamwe n’uwa Kongo Felix Tshisekedi. Ntiyavuze ivyo bavuganye n’uburyo bavuganiyeko.

Akamo k’uwo mutegetsi kaje inyuma yaho ku wa kabiri, Ubwongereza bubicishije ku wuserukira u Rwanda muri ico gihugu, bwasavye ruvana abasirikare babwo bose bari ku butaka bwa Kongo.

Hagati aho, ku ncuro ya mbere ku wa gatanu, akanama ka ONU kajejwe umutekano nako kariyamirije katarya umunwa “ Ibikorwa vy’u Rwanda muri kongo, birimwo ugishigikira M23.”

Ingingo zemejwe ijana kw’ijana n’ibihugu bigize ako kanama, zisaba u Rwanda guhagarika gushigikira M23 no kuvana abasirikare barwo bidatevye muri Kongo. Zisaba kandi M23 kuva mu bice vyose yigaruriye cane cane I Goma n’I Bukavu. (AFP)