Intambara yo mu Burasirazuba bwo hagati: kuri uyu wa kane, Hamas yashubije Isiraheli imirambo y’ingwate enye mu yashimuse mu gitero cyayo cyo mu kwa cumi 2023.
Muri iyi mirambo harimo iy’umutegarugoli witwa Shiri Bibas n’abana be babiri bari bo batoya mu myaka y’amavuko, Kfir w’imyaka itanu na karumuna ke Ariel katwawe bunyago mu 2023 gafite amezi icyenda.
Umugabo wa Yarden Bibas ari nawe se w’aba bana nawe yashimutanywe nabo, aza kurekurwa kw’itariki ya mbere y’uku kwezi kwa kabiri mw’ihanahana ry’imfungwa hagati ya Hamas na Isiraheli.
Umurambo w’uwa kane ni uw’umukambwe witwa Oded Lifshitz, w’imyaka 84. Ni ubwa mbere Hamas itanze imirambo y’ingwate. Kugeza ubu yasubizaga Isiraheli abakiri bazima.
Hamas yabanje gushyikiriza CICR (Komite mpuzamahanga ya Croix-Rouge) amasanduku y’ibara ry’igikara arimo imirambo. Nayo iyaha Isiraheli.
Mw’itangazo yashyize ahagaragara, Perezida Isaac Herzog wa Isiraheli, yagize, ati: "Imitima yacu, imitima y’igihugu cyose, yashwanyaguritse." Yongeraho, ati: "Turunamye tubasaba imbabazi ko tutabashije kubarengera."
Gutanga iyi mirambo biri mu rwego rw’agahenge ko guhagarika intambara kagomba kumara ukwezi n’igice uhereye kw’itariki ya 19 y’ukwa mbere gushize. Gashigaje rero ibyumweru bibiri.
Hamas yishe abantu barenga 1,200, itwara bunyago abandi 251, mu gitero cyayo cyo kw’itariki ya 7 y’ukwa cumi 2023. Isiraheli ivuga ko 70 bakiri imbohe muri Gaza, ariko ko 35 muri bo bashobora kuba barapfuye.
Naho intambara ya Isiraheli yakurikiye kiriya gitero imaze guhitana abantu hafi 48,300 muri Gaza, nk’uko Hamas ibivuga. ONU nayo ivuga ko iyi mibare ishobora kuba yegera ukuri. (VOA, Reuters, AP, AFP.
Forum