Ejo ku wa kabiri, Uburundi n’Ububirigi vyarashize umukono ku masezerano yo gufashanya mu vy'iterambere. Ni amasezerano azogenga umugambi wiswe “Ntusigare inyuma” uzomara imyaka itanu.
Ububirigi buzoshira muri uwo mugambi miliyoni 75 z’amayero ni ukuvuga miliyaridi 22 z’amafaramga y’amarundi.
Uwo mugambi uzokorerwa mu ntara ya Cibitoke iri mu buseruko bushira uburengero bw’Uburundi n’intara ya Kirundo iri mu buseruko bw’igihugu mu kiringo c’imyaka itanu.
Icegera c’umuyobozi mukuru mu gihugu c’Ububirigi ajejwe ivyo gufashanya mw’iterambere no gufasha kiremwa muntu, Bart Pennewaert, yasiguye ko ayo mahera ari igice c’ayagize uko gufashanya kandi ko ari intango yo kwongera gusubiza itoto ugufashanya kw’ibi bihugu.
Ku ruhande rw’igihugu c’Uburundi, Syldie Manirerekana, umwunganizi w’umushikiranganji w’imigenderanire no gufashanya mw’iterambere, yibutsa ko imigenderanire no gufashanya ku Burundi n’Ububirigi bifise imyaka irenga ijana. Kandi ko nubwo hari ivyagiye biracamwo bigatosekaza imigenderanire y’ivyo bihugu, Uburundi bwipfuza kubona Ububirigi busubiye kuba mu bihugu vyambere bifashanya n’Uburundi.
Amategeko agena ugufashanya kw’ibihugu vy’Uburundi n’Ububirigi yatanguranye n’umugwi ugizwe n’abarundi bo mu bisata bitanu nko mu burimyi n’ubworozi, amagara y’abantu, gushigikirana n’ibindi hamwe n’ababirigi.
Mu bushikiranganji bw’imigenderanire basaba izo mpande zibiri gushira hamwe no gukoresha ubushishozi ku neza ya bose. Umugambi Ntusigare inyuma uzorangurwa mu kiringo co kuva mu 2024 gushika 2028.
Igihugu c’Ububirigi congeye kuvyura ugufashanya n’Uburundi inyuma y’imyaka hafi icumi bwari bwarahagaritse imfashanyo. Ni kuva inyuma y’imigumuko yo mu 2015 yiyamiriza ukwitoza kw’uwahoze arongoye Uburundi umuhisi Petero Nkurunziza.
Forum