Kizza Besigye, umunyapolitike atavuga rumwe na Reta ya Uganda, kuri uyu wa gatatu, yareguntse umwanya mutoyi imbere ya sentare ya gisivile, asa n'uwufise amagara make.
Kizza Besigye yaserutse muri sentare mu gihe abamuburanira bariko bagerageza gutuma arekurwa. Umucamanza yatangaje ko amagara ya Besigye atari ameze neza kugira akwirikirane urubanza rwiwe.
Besigye, vyagaragara ko amagara yiwe atameze neza, yapfunzwe kuva mu kwezi kw’icumi na rimwe mu mwaka urangiye w’i 2024, yaciye asubizwa n’imodoka mw’ibohero ricunzwe cane ku murwa wa Uganda, Kampala.
Ukubandanya gupfungwa kwa Kizza Besigye, kuriko gutuma akamo k’abamushigikiye k’uko yorekurwa gatera kiyongera. Baragabisha ko akeneye kuvurwa kandi ko yotegerezwa kuvanwa mu buryo apfunzwemwo. Batangaza ako icomushikira ari mu munyororo bishobora gutuma haba uruhagarara rwokwiha inkumbi mu gihugu.
Umuryango wiwe watangaje ko yatanguye kugarariza gufungura mu ntumbero yo kwiyamiriza ukubandanya gupfungwa kwiwe. Sentare nkuru ya Uganda, mu kwezi kurangiye, yafashe ingingo ko sentare za gisirikare zidashobora gucira imanza abasivile.
Ababuranira Besigye, batangaje ko we n’abandi bagirizwa hamwe ivyaha muri sentare ya gisirikare bari kuba barekuwe buno nyene. Abategetsi b’ubutungane bavuze ko bariko bihweza ivyemezo bafise kuri Besigye kugira bamwegeko ivyaha muri sentare y’igisivile. (AP)
Forum