Umushikiranganji ajejwe imigenderanire ya Reta Zunze Ubumwe za Amerika, Marco Rubio ntazokwitaba inama y'imisi ibiri y'abashikiranganji bajejwe imigenderanire b’umurwi G20, ugizwe n'iibihugu biteye imbere n'ibiriko biratera imbere kurusha ibindi kw'isi izotangura kuri uyu wa kane muri Afrika y'epfo.
Marco Rubio ntazokwitaba iyo nama inyuma y’uko anebaguye Afrika y’epfo, igihugu kizokwakira iyo nama mu kuvuga ko kirwanya Amerika. Aho kuja mu nama y’abashikiranganji bajejwe imigenderanire b’ibihugu bigize umurwi G20, Marco Rubio, kuri uyu wa gatatu, yatahutse muri Amerika, avuye mu rugendo rwiwe rwa mbere mu karere ko mu buseruko bwo hagati bw’isi.
Yari yayoboye abategetsi bari baserukiye Amerika mu biganiro n’abategetsi b’Uburusiya, ku ngwano muri Ukraine. Ivyo biganiro vyabereye ku murwa mukuru wa Arabiya Sawudite, Riyad.
Umushikiraganji ajejwe imigenderanire ya Amerika, Marco Rubio, yaravuganye n’abashikiranganji bajejwe imigenderanire y’Ubufransa, Ubudagi, Ubutaliyano, Ubwongereza n’umutegetsi mukuru ajejwe imigenderanire mw’ishirahamwe ry’ubumwe bw’Ubulaya.
Hari mu ntumbero yo kubacira ku mayange ku vyo yari ahejeje kuganirako, kuri uyu wa kabiri, n’umushikkiranganji ajejwe imigenderanire y'Uburusiya, Sergei Lavrov, nk’uko vyatangajwe n’ubushikiranganji bujejwe imigenderanire y'Amerika.
Vyitezwe ko abategetsi bakomeye baserukira ibihugu vy’i Bulaya, co kimwe n’umushikiranganji ajejwe imigenderanire y’Uburusiya, Sergei Lavrov, n’uw’Ubushinwa, Wang Yi, bitaba inama y’abashikiranganji bajejwe imigenderanire mu mihugu bigize umurwi G20. Iyo nama izotangura kuri uyu wa kane, mu gisagara ca Johannesburg. Amerika izoserukirwa n’abategetsi bo ku rwego rwo hasi. (AP)