Abayobozi bashinzwe ubuzima muri Kenya, bavuga ko abagendana ubwandu bwa vurisi itera Sida, bagizweho ingaruka n’ihagarikwa bya PEPFAR, programu yatangijwe na perezida w’Amerika George W Bush mu mwaka 2003 mu rwego rwo guhangana n’iyo virusi.
Abantu barenga 135.000, ni ukuvuga hafi 11 ku ijana by'abatuye i Kisumu banduye virusi itera SIDA, ugereranije n’abanduye mu gihugu hose, babarirwa kuri gatatu ku ijana.
N'ubwo ubutegetsi bwa Perezida Donald Trump w’Amerika bwatangaje ko budohoreye ubuvuzi burengera ubuzima mu mavuriro aterwa inkunga na PEPFAR, ibigo byatangaga imiti igabanya ubukana bwa Sida i Kisumu byarafunze nyuma gato y’uko imfashanyo ya mbere ihagaritswe, kandi ibi byose biracyafunze.
Porogaramu PEPFAR yahagaritswe mu buryo butunguranye mu mpera z’ukwezi kwa mbere, ubwo Perezida w’Amerika, Donald Trump, yahagarikaga gahunda nyinshi z’imfashanyo z’amahanga iminsi 90.
Mu mwaka wa 2003, Ambasade y'Amerika muri Kenya yavuze yakoresheje miliyari 8 z'amadolari mu myaka 20 mu bikorwa bya PEPFAR muri iki gihugu. Izo program zageze ku bantu hafi miliyoni 1.3 bafata imiti igabanya ubukana bwa virusi itera Sida kandi zarengeye ubuzima bwa “miliyoni” z’abantu.
Mu cyumweru gishize, umuryango w’abaganga batagira imipaka, Medecins Sans Frontieres, wemeje ko programu zo gukumira ubwandu bwa virusi itera Sida, n’iz’iyobowe n’abaturage ubwabo zigamije gucunga ubwo bwandu, zari zikomeje guhagarara mu karere. (AFP)
Forum