Sentare nkuru ya Muha i Bujumbura mu Burundi igenekerezo rya 14 z'uku kwezi kwa kabiri yarakatiye Muganga Christophe Sahabo umunyororo w’imyaka 20 n’ihadabu iremereye cane. Dr. Sahabo yahoze ari umukuru w’ibitaro Kira Hospital biza imbere mu bitaro bikomeye mu Burundi. Mu vyaha Sentare imwagiriza, harimwo ivyo gukoresha impapuro z’ububeshi.
Hambavu y’umunyororo w’imyaka 20, sentare nkuru ya Muha itegeka ko ubutunzi bwose bwa Mugannga Sahabo buri mu Burundi bufatwa, agatanga ihadabu y’imiriyoni indwi mu mafaranga y’amarundi, n’indishi y’imiriyoni zirenga 178 mu mafaranga y’abanyaburaya, hamawe n'amadorari y’Amerika agera ku bihumbi 8600.
Me Gustave Niyonzima aburanira Muganga Christophe Sahabo imbere ya za sentare mpuzamakungu, avuga ko ari urubanza bakiriye nabi. Mu kiganiro yagiranye n’Ijwi ry’Amerika, yadondaguye amategeko yemeza ko yahonywanze muri uru rubanza, muri yo harimwo ukutamuburanisha ku mwanya, no kumumaza umwanya munini mw'iperereza.
Me Niyonzima asigura ko "Uretse ko icaha co gukoresha impapuro mpimbano yagirizwa ataco yakoze", igihano c’imyaka 20 yaciriwe kubera ico caha, ubundi mu Burundi gihanishwa imyaka 5 gusa.
Ku ruhande rw’umuryango wa Muganga Christophe Sahabo, nabo nyene bavuga ko bakiriye nabi urubanza rwaciriwe uwabo. Mukuru wiwe Jean Marc Sahabo, yasiguriye Ijwi ry'Amerika ko, ibi biza vyunyugwa n’amagara ya Muganga Christophe bemeza ko atako yifashe.
Muganga Sahabo Christophe, yamenyekanye cane atwara ibitaro vy’akarorero bikomeye mu vyigenga i Bujumbura, Kira Hospital, ari na ho yari asanzwe avura nk’umuhinga mu ngwara z’amaso, akaba yari n’umwigisha muri za kaminuza.
Yafatiwe mu biro iwe mu ntango z’ukwezi kwa kane ko mu 2022, ari kumwe n’umufaransa Dr Jean-David Pillot, yatwara ico gihe urwego nyobozi rw’ivyo bitaro. Bajanywe gufungirwa mu biro vy’iperereza i Bujumbura nk’uko abamuburanira bavyemeza, bukeye uwo mufaransa abona kurekurwa.
Ibitaro yatwara, ahanini umutahe wabitanguje wari uw’ishirahamwe ryo mu Busuwise, ariko nawe nyene yarafisemwo umutahe muto. Iki gihugu c’Ubuswise ni naco, Muganga Christophe Sahabo yaherejemwo amashure mu vyo kuvura amaso, imbere yo gutahuka mu Burundi no gutanguza Kira Hospital mu 2015.
Amaze gushinga ivyo bitaro bigashinga imizi, vyarateye imbere, abarwayi bo mu karere barabihurumbira, bitangura kwinjiza amafaranga mvamakungu atari make.
Amakuru yo kwizera Ijwi ry’Amerika rikura mu mpande zitandukanye zirimwo abegereye ubutegetsi bwo mu Burundi, yemeza ko ko mu vyo Muganga Christophe Sahabo ariko arazira, harimwo ko yabaye intambamyi ikomeye ko reta igira imitahe myinshi muri ivyo bitaro.
Ijwi ry’Amerika ryashatse kumenya ico ubushikiranganji bw’ubutungane bubivugako, ariko kugera duheze gutegura ino nkuru, ntitwashoboye kuronka abo muri ubwo bushikiranganji.
Fyonda hasi wumve ibindi kuri ino nkuru y'Umumenyeshamakuru w'Ijwi ry'Amerika Diane Nininahazwe.
Forum