Ikipe y'Abagore y'Amerika Isoje Umwaka Iyobora Urutonde rwa FIFA

Ikipe y’abagore y’umupira w’amaguru y’igihugu ya Leta zunze ubumwe z’Amerika irangije umwaka w’2024 ari iya mbere ku rutonde rwa FIFA, Ishyirahamwe ry’umupira w’amaguru ry’isi yose.

Amerika yatwaye umudari wa zahabu mu mikino ya Olempiki mu kwezi kwa munani gushize mu Bufaransa. Yatsinze Burezile kimwe ku busa. Byatumye izamukaho imyanya ine, iba iya mbere kw’isi. Kuva icyo gihe ntiyigeze isubira inyuma.

Ikipe y’igihugu y’abagore ya Leta zunze ubumwe z’Amerika yavutse mu 1985. Ni yo yatwaye igikombe cy’isi inshuro nyinshi kurusha ibindi bihugu. Yagitsindiye inshuro enye ku nshuro icyenda yageze mu mikino ya nyuma mu 1991, 1999, 2015, no mu 2019.

Ni nayo yatsindiye umudari wa zahabu mu mikino ya Olempiki kenshi, inshuro eshanu ku nshuro umunani yageze mu mikino ya nyuma mu 1996, 2004, 2008, 2012, n’2024.

Uretse ibyo, yatwaye n’ibikombe icyenda bya CONCACAF, Ishyirahamwe mpuzamahanga ry’imigabane y’Amerika ya Ruguru, iyo Hagati, na za Karayibe.

Kuva FIFA itangiye gukora urutonde rw’amakipe y’abagore mu 2003, iy’Amerika yabaye iya mbere imyaka 13. Muri rusange, ntiyigeze ijya munsi y’umwanya wa gatanu.

N’ubwo iyi kipe yanditse amateka, abakinnyi bayo ntibahembwaga umushahara ungana n’uwa basaza babo bo mw’ikipe y’igihugu y’abagabo. Babigize urugamba rurerure, baza kurutsinda mu kwezi kwa kabiri 2022. Ni bo ba mbere kw’isi babigezeho.

Ku rutonde rwa FIFA rw’uyu mwaka w’2024, amakipe icumi ya mbere, uko akurikirana, ni Leta zunze ubumwe z’Amerika, Esipanye, Ubudage, Ubwongereza, Suwede, Kanada, Burezile, Ubuyapani, Koreya ya Ruguru, n’Ubuholandi.

Ku makipe y’ibihugu by’Afrika, Afrika y’Epfo ni iyo iri imbere ku mwanya wa 53. Ibihugu by’Umuryango w’Afrika y’Uburasirazuba EAC, Repubulika ya Demokarasi ya Kongo ni iy’109. Tanzaniya: 145. Uganda: 148. Kenya: 149. Rwanda: 168. Burundi: 178. Sudani y’Epfo: 193.

Urutonde rwa FIFA ruriho ibihugu 195. Somaliya ntiriho, kimwe n’ibindi bihugu icyenda, ari byo Afuganisitani, Koweyiti, Katari, Libiya, Eritereya, Cadi, Sudani, Jibuti, na Moritaniya.

FIFA isobanura ko ibihugu bitari ku rutonde bitigeze bikina na rimwe mu mezi 48 ashize, cyangwa se bitakinnye inshuro zirenga eshanu n’andi makipe ari ku rutonde.

FIFA ikora urutonde inshuro enye mu mwaka.