Muri Namibiya, ibiharuro vya mbere vy’ivyavuye mu matora vyashizwe ahabona, umunyapolitike aserukira umugambwe SWAPO, uri ku butegetsi muri Namibiya, , Netumbo Nandi-Ndaitwah, kuri uyu wa mbere yari imbere y’abo bahiganwa. Yamara amatora y’umukuru w’igihugu yaranzwe n’ibibazo bitari bike vyatumye ikiringo cayo congerezwa, imisi itatu.
Abatavuga rumwe na reta bariyamirije ivyavuye mu matora. Batangaje ko kwongereza ikiringo c’amatora vyari biciye kubiri n’amategeko. Vyitezwe ko ibiharuro vya nyuma vy’ivyavuye mu matora bitangazwa muri iyi ndwi.
Abatavuga rumwe na reta batangaje ko bazoshingisha uburanza muri sentare kubera batazokwemera ibizoba vyavuye mu matora. Abanyanamibiya, ku musi wa gatatu w’indwi irangiye, batoye umukuru w’igihugu n’abagize inama nshingamateka .
Umugambwe, SWAPO, uri ku butegetsi muri Namibiya kuva ico gihugu cikukira mu mwaka w’i 1990. Yamara abanyagihugu ntibakiwufitiye icizere kubera bahanganye n’urugero ruri hejuru cane rw’ubushomeri hamwe n’ibindi bibazo vy’ubutunzi, cane cane, mu bakiri bato. Inyifato irangwa mu bategetsi ya ruswa n’ibiturire yarambitse ibara umugambwe wahora ubonwa nk’uwahabuje abanyagihugu.
Umugambwe utavuga rumwe na reta, Independent Patriots for Change, watangaje ko uzoshingisha urubanza muri sentare ku vyavuye mu matora muri iyi ndwi. Iyindi migambwe itavuga rumwe na reta yatangaje ko izokwifatanya na wo muri urwo rubanza.
McHenry Vennani, ayoboye umugambwe utavuga rumwe na reta, Popular Democratic Movement, yitoje mu mabanga y’umukuru w’igihugu, yavuze ko amatora yabaye ku musi wa gatatu w’indwi irangiye yerekeye igihugu n’akaranga kaco ka demokrasi. Yavuze ko ayo matora yerekeye igihugu gikorera abanyagihugu bose, abakene n’abatunzi, ko ayo matora atari ay’ abashaka kuguma ku butegetsi vyanke bikunde. Urwego rw’igihugu rujejwe gutunganya amatora muri Namibiya rwatangaje ko ata ncuro ya kabiri y’amatora izoba naho abatavuga rumwe na reta bariko babisaba. (AP)
Forum