Umunyapolitike Freeman Mbowe, uyoboye ishyaka ritavuga rumwe n’ubutegetsi muri Tanzaniya wari watawe muri yombi na polisi yarekuwe hatanzwe ingwate y’amafranga.
Yafashwe mu gihe muri icyo gihugu bari mu myiteguro y’amatora ku nzego zibanze. Hari abafata ayo matora nk’igipimo cyo kumenya uko igikundiro cya Prezida Samia Suluhu Hassan mu baturage gihagaze.
Uyu yagiye ku butegetsi mu 2021, maze yizeza ko azazana impinduka mu gihugu akemerera ubwisanzure mu baturage. Gusa abakurikiranira hafi ibintu muri icyo gihugu bavuga ko Prezida Hassan yatengushye benshi kuko atihanganira abo batavuga rumwe, kandi ko ategekesha igitugu.
Prezida Hassan yagiye ku butegetsi nyuma y’urupfu rutunguranye rw’uwo yasimbuye John Pombe Magufuli.
Kuwa gatanu, ishyaka Chadema ryari ryatangaje ko umuyobozi waryo Mbowe, n’abandi bayobozi b’ishyaka bafashwe bavuye mu gikorwa cyo kwiyamamaza cyaburijwemo na polisi.
Ku rubuga rwa X, iri shyaka kuri uyu wa gatandatu ryemeje ko abayobozi baryo bari bafunzwe barekuwe bamaze gutanga ingwate.
Amaze kurekurwa Mbowe yavuze ko bamwe muri bagenzi be bakubiswe na polisi nubwo batigeze barwanya ifatwa ryabo. Avuga ko ifatwa ryabo ari umugambi ugambiriwe wa leta wo kubangamira ibikorwa byabo byo kwiyamamaza.
Forum