Ikigo cy’igihugu gishinzwe ubuzima mu Rwanda, RBC, kiratangaza ko mu mezi 9 y’uyu mwaka wa 2024, abarwayi ba Malariya bikubye kabiri ugereranyije no mu mwaka wa 2023. RBC ivuga ko abarwayi bavuye ku 300,000 mu 2023, bagera ku 500,000 mu mezi icyenda y’uyu mwaka.
Iki kigo gisobanura ko ubwiyongere bw’iyi ndwara bwagaragaye cyane mu turere twa Gisagara, Bugesera, Nyagatare , Kirehe , Nyaza Kicukiro na Gasabo. Umuyobozi w'ishami rishinzwe kurwanya malariya muri RBC, Muganga Mbituyumuremyi Aimable, avuga ko uku kwiyongera kwatumye n’abarwaye marariya y’igikatu nabo biyongereye. Aba bavuye kuri 850 bariho mu mezi icyenda ya mbere ya 2023, mu gihe uyu mwaka wo abarwayi bageze ku 2.000.
Ijwi ry’Amerika ryasuye ikigo nderabuzima cya Rubungo, mu murenge wa Ndera mu karere ka Gasabo mu mujyi wa Kigai, kamwe mu kavugwa kwibasirwa n’iyi ndwara. Bwana Kalisa Pie, umukozi ushinzwe imibare, mu kiganiro yahaye Ijwi ry’Amerika, yahamije ko mu kigo Nderabuzima cyabo malariya yiyongereye ugereranyije n’imibare bari bafite umwaka ushize.
Mu buryo bwo kwirinda iki cyorezo bwatekerejweho, Muganga Aimable Mbituyumuremyi yongeraho ko inzego z’ubuzima zizakomeza gushyigikira ingamba zirimo gukomeza gutera imiti mu turere 12 tuzahaye cyane kurusha utundi.
RBC igaragaza ko mu mwaka wa 2016-2017 ari bwo mu Rwanda hagaragayemo abarwayi benshi ba malariya kuko bari hejuru ya miliyoni eshanu mu gihugu. Abari barwaye malariya y’igikatu bari 18.000, ikaba yarahitanye abantu 600.
Ntabwo twabashije kumenya abahitanwe n’iyi ndwara, mu mezi icyenda ya mbere y’uyu mwaka, kuko ababishinzwe batubwiye ko bakegeranya imibare.
Fyonda hasi wumve ibindi kuri ino nkuru ya Assumpta Kaboyi.
Forum