Inama y’ubuyobozi bwa Sudani, kuri uyu wa gatatu, yavuze ko ishobora kwagura igihe cyagenewe imikoreshereze y’umupaka wa Adre uhuza Sudani na Cadi.
Uyu mupaka ukenewe n’imiryango itanga imfashanyo, kugirango ibashe kugeza ibiribwa n’ibindi bikoresho mu ntara zishobora kwibasirwa n’inzara za Darfur na Kordofan.
Uyu mupaka wafunzwe n'itegeko rya guverinoma iyobowe n'ingabo za Sudani mu kwezi kwa kabiri. Wongeye gufungurwa igihe cy’amezi atatu kuva mu kwa munani kuzageza kw’itariki ya 15 y’uku kwa 11.
Ariko ntibyari byasobanuka niba icyo gihe kizongerwa. Abagize guverinoma barwanyije ifungurwa ry'uwo mupaka, bavuga ko utuma umutwe witwara gisirikare wa RSF wambutsa intwaro.
Cyakora, ingabo za Sudani, ntiziwugenzura kuko uri ku butaka bwafashwe na RSF mu mwaka ushize. Uyu mutwe ugenzura ibice hafi ya byose bya Darfur.
Imiryango itanga imfashanyo yirengagije amabwiriza ya guverinema yemewe n’amahanga, kandi yagiye yifashisha uwo mupaka, ubonwa nk’inzira yihuse yo kwambutsa ibyangombwa, aho kubinyuza mu gice kigenzurwa n’igisirikare, i Port Sudan, cyangwa ahandi mu gice cyitaruye cyo ku mupaka cya al-Tina.
Kongera gufungura uyu mupaka wa Adre mu kwezi kwa munani, byahuriranye n’ibihe by’imvura n’isenyuka ry’imihanda n’ibiraro, bivuze ko haciye imfashanyo nke kw’ikubitiro.
ONU yatangaje ko amakamyo arenga 300 y’imfashanyo atwaye ibintu bikenewe n’abantu barenga miliyoni 1.3 yarambutse yinjira muri Sudani anyuze kuri uwo mupaka.
Forum