Izinga Rya Maurice Rigiye Gufuta Ibiro vy'Iperereza Kugira Abanyagihugu Bisanzure

Umurwi ujejwe gutunganya amatora mu mazinga ya Morise watangaje ko urunani rw’imigambwe itavuga rumwe n’ubutegetsi rwatsinze amatora n’amajwi 62.6%.

Urwo runani kandi rwaronse ibibanza 60 kuri 62 vyo mu nama nshingamateka. Iyo ntsinzi ihaye ikindi kiringo kigira kane uwurongoye urunani rw’imigambwe itavuga rumwe n’ubutegetsi, Navin Ramgoolam, yabaye umushikiranganji wa mbere incuro zitatu.

Ramgoolam yatangaje ko kubera iyo ntsinzi ikomeye muri ayo matora ikintu ca mbere gikomeye azogira ari ugufuta ibiro vy’igihugu bijejwe iperereza kugira ngo abanyagihugu bashobore gushikiriza ikibari ku mutima ata nkomanzi.

Umushikiranganji wa mbere yahora ku butegetsi, Pravind Jugnauth, ejo ku musi wa mbere yaremeye ko yatsinzwe amatora. Yavuze ko yakoze ibishobotse vyose ariko urunani rw’imigambwe icuditse n’uwiwe rwarushijwe.