Prezida wa Amerika Joe Biden ku munsi wa gatatu w’indwi iza azokwakira mu ngoro yiwe Donald Trump yahoze ari prezida wa Amerika akaba aherutse gutsinda amatora.
Ibiro vya Prezida Biden vyatangaje ano makuru bivuga ko uguhura kwa Biden na Trump ari intambwe ya mbere iganisha ku guhanahana ubutegetsi biciye mu mahoro, nkuko Biden yavyemeye.
Donald Trump azorahira nka prezida wa Amerika itariki ya 20 y’ukwezi kwa mbere ko mu mwaka uza wa 2025.
Hagati aho, ejo ku wa gatandatu, Nancy Pelosi yigeze kuba umukuru w’inama nshingamateka ya Amerika yavuze ko Prezida Joe Biden ari we yatumye Visi Perezida Kamala Harris atsindwa mu matora Donald Trump aheruka kwegukanamwo intsinzi.
Mu kiganiro yagiranye n’ikinyamakuru The New York Times, Madamu Pelosi yavuze ko Kamala yari afise amahirwe yo gutsinda iyo Prezida Biden aja gutangaza hakiri kare ko aretse kwiyamamaza.
Pelosi yavuze kandi ko umugambwe w’abademokrate wari witeguye gutanga uwuzobaserukira mu matora, ariko Prezida Biden abiburizamwo kubera ko inyuma y’isaha imwe akimara gutangaza ko atazokwitoza, yaciye avuga ko ashigikiye Kamala Harris.
Forum