Abaturage bemerewe gutora muri Amerika kuri uyu wa kabiri baramukiye mu matora yo kwihitiramo perezida wabo utaha. Kamala Harris yamaze iminsi ye ya nyuma yo kwiyamamaza muri leta y’ingenzi ya Michigan. Aha yahuriye n’abatora mu nzu y’uburiro resitora y’i Detroit ndetse ageza ijambo ku bari bakoraniye mu rusengero rw’aho hafi.
Aha yavuze ko abatora bo mu ishyaka rye ry’abademokarate basanzwe barangwa n’ibara ry’ubururu, biyunzweho n’abatora bo mu ishyaka ry’abarepubulikani bo basanzwe barangwa n’ibara ritukura.
Umwe mukandida w’ishyaka ry’abademokarate yagize ati: “Ndabona igihugu cyiyemeje guhindura ipaji y’urwango n’amacakubiri maze kigahanga inzira nshya. Aho ngenda hose, mpura n’abanyamerika, kuva ku bo muri leta zitwa iz’ab’ibara ritukura kugeza ku zitwa iz’abibara ry’ubururu, bose biteguye guhindura ikirari cy’amateka bagana ku butabera.”
Ku ruhande rwe, Donald Trump nawe yiyamamarije muri leta za Michigan na Karolina ya Ruguru, leta imigendekere y’amatora yayo ihindagurika cyane, aho yabwiye abamushyigikiye ko yizeye gutsinda ku munsi w’amatora.
Uyu wahoze ari perezida urimo guhatanira kwisubiza intebe y’umukuru w’igihugu yagize ati: “Bitewe n’uko twashyizemo intera ndende cyane, icyo tugomba gukora, ni ugusohoka kuwa Kabiri tukajya gutora, tugatora.”
Bwana Trump yabwiye abamushyigikiye ko abakeba babo batangiye kugerageza kwiba aya matora. Ati: “Barariganya mu matora, mwabahangara mubavuguruza, bagashaka kubafunga. Nimubitekerezeho. Ni ikintu kidasanzwe ntigeze mbona na rimwe. Ariko ndabikunda. Muzi impamvu? Ni ukubera ko hari ikintu twagaragaje. Hari icyo twerekanye. Kandi icyo tugiye kugikemura. Ndetse tugomba gutsinda aya matora.”
Madamu Harris we yemeza ko aya matora arenze kure politiki y’ubufana bushingiye ku nyungu z’amashyaka ndetse n’abo we avuga ko “bashaka gukaza umurego w’amacakubiri, kubiba urwango, kongera icyoba ndetse no guteza akaduruvayo.”
Visi Perezida Kamala Harris yagize ati: “Kandi niyemeje gutega amatwi abantu batumva ibintu kimwe nanjye, bitewe n’uko, murabibona, sinemera ko abo tutumva ibintu kimwe ari abanzi. Ndetse yewe, nzabaha umwanya ku meza, kubera ko ibyo ni byo abayobozi bakomeye bakora.”
Hafi abanyamerika miliyoni 80 bamaze gutora muri aya matora y’uyu mwaka. Ni ukuvuga hafi kimwe cya kabiri cy’abaturage bose batoye mu myaka ine ishize. Abo ni abari mu cyiciro cy’abatoye mu itora rya mbere y’umunsi w’amatora.
Amakusanyabitekerezo yerekana ko ihiganwa ryegeranye cyane, aho ikusanyabitekerezo riheruka ryakozwe n’ikinyamakuru New York Times na Kaminuza ya Siena College ryagaraje ko Trump na Harris banganya amajwi 48 ku ijana buri umwe.
Forum