Ishyaka Botswana Democratic Party, BDP mu magambo magufi, rimaranye ubutegetsi imyaka 58, ryiteguye kubugumana.
Ku baturage bayo miliyoni 2.6, miliyoni imwe ni bo bazindukiye mu matora. Kandida wayo, Perezida Mokgweetsi Masisi (w’imyaka 63 y’amavuko), yizeye gutsindira manda ya kabiri y’imyaka itanu. Iya mbere yaranzwe n’ikibazo cy’ubushomeri cyigarije abantu 27%, cyane cyane abakiri bato (bagize 40% cy’abaturage). Ubukungu muri rusange bwasubiye inyuma. Nyamara Botswana ikize cyane kuri diyama.
Diyama yatumye Botswana itera imbere mu myaka ya mbere yakurikiye ubwigenge bwayo. Abantu benshi bavuye mu bukene bwa nyakujya. Muri iki gihe, abakire, batarenze n’10%, ni bo bikubiye umutungo wose w’igihugu, nk’uko Banki y’Isi yose ibigaragaza.
Naho abaturage barega ubutegetsi ko bwamunzwe na ruswa, icyenewabo, no gucunga nabi igihugu.
Abandi bakandida batatu bahanganye na Perezida Masisi. Ariko bagize ikibazo cyo kwiyamamaza kubera amikoro. Amahirwe yabo ni make, kimwe n’uko amashyaka
yabo mu matora y’inteko ishinga amategeko. Aya nayo ni BDP ya Perezida Masisi yiteguye kuyatsinda. Inteko ishinga amategeko ifite intebe 61.
Botswana yari koloni y’Ubwongereza. Yabonye ubwigenge kw’itariki ya 30 y’ukwa cyenda 1966. Ifite amashyaka menshi. Ariko kuva icyo gihe kugeza n’ubu, BDP ni yo yonyine iyoboye igihugu.
Botswana ni igihugu cya 48 mu bunini kw’isi. Ifite ubuso bwa km2 581,730. Ntikora ku Nyanja. Ihana imbibi n’ibihugu bine: Afrika y’Epfo, Namibiya, Zambiya na Zimbabwe. (AFP, Reuters
Forum