Steve Bannon, wabaye umujyanama n’inkoramutima cyane ya Donald Trump, umukandida w’ishyaka ry’Abarepubulikani yasohotse gereza nyuma y’amezi ane yari amaze afunze.
Bannon yarekuwe mu gitondo cyo kuri uyu wa kabiri asoje igihano yahanishijwe kubera icyaha cyo gusuzugura inteko ishinga amategeko. Yari afungiwe muri gereza yo ku rwego rw’igihugu muri Leta ya Connecticut.
Uyu wagize uruhare rukomeye mu gufasha Donald Trump gutsinda amatora yo mu 2016, yabwiye itangazamakuru hanze ya gereza ati: “Gufungwa kwanjye ntibyampungabanije, ahubwo byatumye ndushaho gukomera.”
Intandaro yo gufungwa kwa Bannon, ni ukwanga kwitaba komisiyo yihariye y’Umutwe w’Abadepite yakoraga anketi ku gitero cy'abayoboke ba Trump cyo ku italiki ya 6 y'ukwa mbere gushize kuri Capitol. Yari yahamagajwe kuyisobanurira ibyo yaba azi kuri iki gitero. Icyo gihe yanze kuyitaba. Steve Bannon arekuwe hasigaye icyumweru kimwe gusa ngo muri Amerika habe amatora y’umukuru w’igihugu.
Mu 2020 yarezwe na none ibyaha by’uburiganya no kunyereza inkunga y’amafaranga y’abaturage yagombaga gukoreshwa mu kubaka urukuta ku mupaka uhuza Amerika na Megisike. Mbere yo kuva ku butegetsi mu 2021, Donald Trump yamuhaye imbabazi kuri icyo cyaha n’ibindi.
Forum