Ishyaka ritavuga rumwe n’ubutegetsi muri Mozambique, Podemos ryatanze ikirego gisaba ko amajwi yavuye mu matora yongera kubarurwa. Ibi byatumye haba imyigaragambyo n’urugomo nyuma y’uko bitangajwe ko ishyaka riri ku butegetsi ariryo ryatsinze.
Icyo kirego cyatanzwe ejo ku cyumweru, cyahamagariye urukiko rw’igihugu rushinzwe iyubahirizwa ry’itegeko nshinga gufata icyiswe “guca neza urubanza ku watsinze amatora”, nk’uko bigaragara mu nyandiko ibiro ntaramakuru by’abafaransa, AFP byabonye.
Mu kirego cyaryo, ishyaka Podemos ryasabye urukiko “kongera kubarura amajwi yose yavuye mw’itora”, rivuga ko hari ibintu byinshi bitagenze neza.
Komisiyo y’amatora, kuwa kane yatangaje ko umukandida w’ishyaka riri ku butegetsi rya Frelimo, Daniel Chapo, ari we watsinze na 71 kw’ijana by’amajwi, n’imyanya 195 kuri 250 y’inteko ishinga amategeko.
Iryo shyaka Podemos ryashyize ahagaragara amajwi ryabaruye ubwaryo, rivuga ko umukandida waryo, Venancio Mondlane, yatsinze na 53.3 ku ijana by’amajwi n'imyanya 138 mu nteko ishinga amategeko.
Mu bujurire bwayo mu rukiko, Podemos yasabye ko ibiro by’amatora bitanga ibisobanuro birambuye byerekana uko bateranyije amajwi bahaye komisiyo y’amatora. Abayobozi mu muryango w’ubumwe bw’Uburayi, bavuze ko "bagaragarijwe ibitaragenze neza mw’ibarura ry’amajwi n’ibyahinduwe bidafite ishingiro ku majwi yabaruwe ku biro by’itora no ku rwego rw’akarere.
Abanyarwanda mu Bibasiwe n'Imyigaragambyo
Abanyarwanda batuye mu gihugu cya Mozambike batewe ubwoba n’imvururu zimaze iminsi muri icyo gihugu zakurikiye amatora yateje ibibazo yabaye mu ntangiriro z’uku kwezi kwa 10.
Cleophas Habiyaremye uyobora ishyirahamwe ry’impunzi z’abanyarwanda muri Mozambike, avuga ko amaduka ane y’abanyarwanda ari mu yasenywe akanasahurwa.
Forum