Ingabo zishinzwe umutekano za Isiraheli zataye muri yombi abaturage barindwi b’i Yeruzalemu biturutse ku bivugwa ko bacuraga umugambi wo kwica abategetsi no kugaba ibindi bitero mw’izina rya serivisi y’ubutasi ya Irani.
Ni ubwa gatanu, havugwa ibijyanye no kugerageza bwicanyi buyobowe n’ubutasi bwa Irani, bwaburijwemo na serivisi z’umutekano za Isiraheli mu kwezi kumwe, nk’uko itangazo rihuriweho na Shin Bet na polisi ryabivuze.
Iryo tangazo rivuga ko aba barindwi bakekwa, batuye mu gice cya Beit Safafa, i Yeruzalemu, bateganyaga kwica umuhanga mu bya siyansi wa Isiraheli na Meya w’umujyi ukomeye muri Isiraheli, utavuzwe izina.
Umwe mu bayobozi bakuru ba Shin Bet yavuze ko "Abahanga na ba Meya, hamwe n’abayobozi bakuru b'ikigo gishinzwe umutekano, ndetse n'abandi bayobozi bakuru ba Isiraheli, bakunze kwibasirwa n’ibitero by’abakoreshwa na Irani."
Minisiteri y’ububanyi n’amahanga ya Irani, ntabwo yahise iboneka kugira ngo igire icyo ibivugaho. Itangazo rivuga ko serivise y’iperereza yanagaragaje ko abakekwa bari banashinzwe guturitsa imodoka ya polisi no gutera grenade ku nzu, basezeranyijwe amafranga yangana n’amadolari 53.000.
Umwe mu bakekwa, ufite imyaka 23 y’amavuko, yavuganaga n’ikigo cyo mu mahanga. Uyu yaje gushaka itsinda ryo kumufasha, ryatwitse imodoka i Yeruzalemu, rishushanyisha irangi, ahantu hatandukanye kandi rishakira amakuru y’ubutasi abategetsi ba Irani bari mu mahanga, ku gihugu cya Isiraheli.
Mu gihe cyo gusaka amazu y’abakekwaho ibyaha, abashinzwe umutekano bavuga ko banabonye amafranga angana n’amadolari 13.240, pulake mpimano y’imodoka ya polisi n’amakarita atandukanye y’amabanki.
Ifungwa ryabo ryongerewe igihe kugeza ku itariki ya 24 y’uku kwezi kandi biteganijwe ko inyandiko y'ibirego izashyikirizwa ubushinjacyaha bw'akarere ka Yeruzalemu kubera "uburemere bw’ibyaha by'umutekano", nk’uko bivugwa mw’itangazo. (Reuters)
Forum