ONU yishimiye uburyo gukingira imbasa abana bo mu ntara ya Gaza birimo bigenda neza. Irifuza ariko ko imirwano ihagarara ku neza y’abari mu kaga.
Ishami ONU rishinzwe ibikorwa n’ubutbazi mu gufasha Abanyepalistina UNRWA ryatangaje ko hari intambwe ishimishije irimo guterwa, mu bijyanye no gutanga urukingo rw’indwara y’imbasa ku bana bo mu ntara ya Gaza, ariko ko guhagarika imirwano mu buryo buhoraho mu ntambara imaze amezi 11, bikenewe kugirango abantu boroherezwe umubabaro.
UNRWA yavuze ko mu minsi itatu y’ikingira mu turere twa Gaza rwagati, abana bagera mu 187,000 bahawe urukingo, iki gikorwa kikaba kigiye gukomereza mu tundi turere twa Palestina mu cyiciro cya kabiri.
Gukingira iyi ndwara byatewe n’uko habonetse umwana w’umuhungu mu kwezi gushize warwaye imbasa, bwa mbere mu myaka 25 mu ntara ya Gaza. Isiraheli n’abarwanyi b’umutwe wa Hamas bemeranyijwe guhagarika imirwano amasaha umunani buri munsi mu turere twateganyijwe kugirango gahunda y’ikingira ibashe gushyirwa mu bikorwa. Nta makuru avuga ko hari uwaba yararenze ku masezerano.
Kuri uyu wa gatatu, umuyobozi wa UNRWA, Philippe Lazzarini, ku rubuga rwa X yagize ati: "Ni intambwe ikomeye! Buri munsi mu turere two hagati mu ntara ya Gaza, abana benshi bakingirwa imbasa".
Uyu muyobozi yakomeje agira ati: "Mu gihe itangwa ry’urukingo rw’imbasa, ririmo guha abantu agahenge, igikenewe byihutirwa ni uguhagarika imirwano burundu, abagizwe ingwate bose bakarekurwa, ibyangombwa by’ubutabazi harimo ibyo mu buvuzi n’iby’isuku, bikagera mu ntara ya Gaza nta nkomyi”.
Abanyapalestina bavuga ko impamvu ikomeye yatumye indwara y’imbasa igaruka, ari isenyuka ry’urwego rw’ubuvuzi, n’ibitaro hafi ya byose mu ntambara. Isiraheli ishinja Hamas gukoresha ibitaro mu bikorwa bya gisirikare, ibirego uyu mutwe uhakana. (Reuters)
Forum