Minisitiri w’ububanyi n’amahanga wa Leta zunze ubumwe z’Amerika, Antony Blinken, ari muri Isiraheli kuri iki cyumweru.
Biteganyijwe ko Blinken aganira na minisitiri w’intebe, Benjamin Netanyahu, n’abandi bategetsi batandukanye ba Isiraheli. Uru ruzinduko ni urwa cumi mu mezi icumi ashize, kuva intambara itangiye hagati ya Hamas na Isiraheli. Aragenzwa no gutiza imbaraga umushinga w’amasezerano yo guhagarika imirwano.
Leta zunze ubumwe z’Amerika iwufatanyije n’abandi bahuza, ari bo Misiri na Katari. Basobanura ko ukemura impaka ku tuntu tumwe na tumwe tukiri inzitizi, bakaba bizeye rero ko impande zombi zizawemera. Amasezerano ashobora gushyirwaho umukono i Kayiro mu Misiri mu mpera z’iki cyumweru gitangiye.
Mw’itangazo rimwe basinye bose hamwe, ba minisitiri b’ububanyi n’amahanga b’Ubwongereza, Ubufaransa, Ubudage, n’Ubutaliyani bavuga ko bashyigikiye iyi mishyikirano.
Hagati aho, indege z’intambara za Isiraheli zarashe mu mujyi wa Deir Al-Balah, mu ntara ya Gaza kuri iki cyumweru. Minisiteri y’ubuzima ya Palestinaivuga ko zahitanye abantu 21, barimo abana batandatu na mama wabo.
Forum