Urukiko rwa Uganda rwahamije Thomas Kwoyelo, umuyobozi mu mutwe w’inyeshyamba wa Lords Resistance Army (LRA), ibyaha byinshi by'intambara. Ni ubwa mbere umwe mu bagize uwo mutwe aburanishijwe n'ubutabera bwa Uganda.
LRA yakangaranyije abanya-Uganda ubwo uyu mutwe wari uyobowe
na Joseph Kony imyaka igera kuri 20. Icyo gihe wari uhanganye n’abasirikare b’igihugu, ufite ibirindiro mu majyaruguru ya Uganda.
Kwoyelo yahakanye ibyaha birenga 70 aregwa. Muri ibyo harimo ubwicanyi, gufata ku ngufu, iyicarubozo no gushimuta.
Mu cyumba cy'urukiko mu majyaruguru ya Uganda mu mujyi wa Gulu, kuri uyu wa kabiri Kwoyelo yazunguje umutwe nk’aho atemeranywa n’isomwa ry’urubanza, amaboko yayabusanyije yayarambitse ku meza.
Umucamanza Michael Elubu, umwe muri bane b’urukiko rukuru, asoma umwanzuro w’urukiko, yavuze ko uregwa ahamwa n’ibyaha.
Igisirikare cya Uganda cyafatiye Kwoyelo mu mashyamba yo mu majyaruguru y'uburasirazuba bwa Kongo mu 2009. Kuva icyo gihe yari afunze ategereje kuburana.
Urukiko rwasanze Kwoyelo ahamwa n'ibyaha 44, ibindi 31 byahagaritswe kuko basanze byisubiramo. Yagizwe umwere ku bindi byaha bitatu. (Reuters)
Forum