Uburusiya bwavuze kuri uyu wa gatanu ko burimo kohereza izindi ngabo n’amasasu mu karere ko ku mupaka, aho Ukraine yagabye igitero gikomeye cyo kwihimura cyo ku butaka.
Guhera kuwa kabiri, ingabo za Ukraine zirazenguruka mu karere ka Kursk mu burengerazuba bw'Uburusiya. Birabonwa nk’aho ari cyo gitero gikomeye ku butaka bw'Uburusiya kuva iki gihugu kivogereye Ukraine mu kwezi kwa kabiri umwaka wa 2022.
Minisiteri y’ingabo y’Uburusiya yavuze ko yohereje ibikoresho bya gisirikare, birimo ibyo gukoresha mu gutera za roketi, ibisasu bya rutura, amatanki na za burende hamwe n’amakamyo aremereye kugira ngo bikaze ubwirinzi mu karere, nk'uko ibitangazamakuru bya Leta byabitangaje.
Ingabo za Ukraine zigera ku 1.000 hamwe n’imodoka za burende zirenga 20 n’amatanki, byagize uruhare mu gitero kw’ikubitiro, hakurikijwe ikigereranyo cy’Uburusiya, n’ubwo iki gihugu cyigambye kuva icyo gihe ko cyashwanyaguje byinshi muri ibyo bikoresho.
Ukraine ntiyemeye ku mugaragaro uruhare rwayo, cyakora Perezida Volodymyr Zelensky, mu ijambo rye ejo kuwa kane, yavuze ko Uburusiya bugomba "kumva" ingaruka z’ukuvongera kwabwo.
Kuri uyu wa Gatanu, impande zombi zakajije umurego n’ibitero byo mu kirere mu kwunganira abasirikare barwanira ku butaka.
Ikigo cy’ubutabazi bwihutirwa cya Leta muri Ukraine, cyatangaje ko igitero cya misile cy’Uburusiya cyagabwe ku manywa y’ihangu ku iduka ry’ibiribwa, mu mujyi wa Kostyantynivka mu burasirazuba bwa Ukraine, cyahitanye abantu byibura 11 kikakomeretsa 44.
Uwo mujyi uri muri bilometero nka 13 uvuye aho ingabo z’uburusiya zifite ibirindiro. (AFP)
Forum