Ibyagombaga kuba ibirori byo kwishimira imikino ya Olempike umujyi wa Salt Lake City uzategura muri 2034 byaje kuvamo ihurizo rya Politiki ya Olempike.
Komite Mpuzamahanga ya Olempike yatugaritse abayobozi ba leta ya Utah ngo bahagarike iperereza FBI ikora ku bijyanye no kubindikiranya ibyaha byo gukoresha ibiyobyabwenge-ngufu muri siporo.
Komite Mpuzamahanga y’Imikino ya Olempike yatewe uburakari n’iperereza ririmo gukorwa n’inzego z’ubutegetsi za Leta Zunze Ubumwe za Amerika ku kibazo cy’abakinnyi boga b’Ubushinwa bemerewe kujya mu mikino yo mu Buyapani kandi ibipimo babakozeho byari byagaragaje ko bakoresheje ibiyobyabwenge-ngufu.
Akanama Mpuzamahanga gashinzwe kurwanya Ibiyobyabwenge muri Siporo kemeye ibisobanuro Ubushinwa bwatanze, ariko inzego za Leta Zunze Ubumwe z’Amerika kuri ubu zirimo gukora iperereza kuri icyo cyemezo zigendeye kw’Itegeko rihana Ubugambanyi ryatowe nyuma y’amarorerwa y’ibiyobyabwenge yakozwe n’Uburusiya mu mikino ya Sochi.
Perezida wa Komite, Bwana Thomas Bach, arashaka ko Inama Ishinzwe kurwanya ibiyobyabwenge byongera ingufu aba ariyo yonyine ihabwa ububasha bwo gukurikirana ibyaha by’ibiyobyabwenge, cyane vyane muri iki gihe bitegura imikino ya Olempike y’I Los Angeles muri 2028.
Komite Mpuzamahanga y’Imikino ya Olempike yongereye muri Kontaro y’imikino ingingo isaba ko abakira imikino – harimo na Guverineri wa Leta ya Utah Spencer COX—bakoresha ububasha bafite kugirango iperereza ryo mu rwego rw’igihugu rihagarare, bitaba ibyo ntibahabwe kwakira iyo mikino ya Olempike.
Cox na bagenzi be basezeranije komite ko bazagerageza kumvisha Perezida wa Amerika n’Inteko Ishinga Amategeko igikwiye.
Cox nawe yunzemo ati: ”Twemeranije ko Leta Zunze Ubumwe z’Amerika nizidashyigikira cyangwa nizica amategeko y’Akanama Mpuzamahanga Karwanya Ibiyobyabwenge, ko imikino bazayitwaka ntikorerwe muri Leta Zunze Ubumwe z’Amerika. Nibwo buryo bwonyine twari dufite bwo kuba twahabwa iyi Mikino ya Olempike”
Ndetse no mu rwego rwa diplomasi y’imikino ya Olempike, byabaye kwigerezaho cyane kugirango basabe inzego za guverinoma kwemera ku mugaragaro ko bazashyigikira ibikorwa byo kwamamaza amatwara ya Komite Mpuzamahanga ya Olempike.
Nyuma yuko Leta ya Utah yemeye kubahiriza iyo ngingo, ni bwo Komite Mpuzamahanga ya Olempike yahaye ku mugaragaro umujyi wa Salt Lake City ububasha bwo kwakira imikino ya Olempike yo muri 2034 ku majwi 86 kuri 6.
Umurwa mukuru wa Utah ni wo mujyi wonyine wari usigaye mu guhatanira kwakira imikino ya Olempike nyuma yaho Komite Mpuzamahanga y’Imikino Olempike mu buryo bwo gufangura ihaye Salt Lake City uburenganzira bw’umwihariko bwo kwibariza uburyo yakoresha iyo mikino.
Imwe mu ngingo zikubiye muri kontaro yo gukoresha imikino isaba abayobozi ba Leta ya Utah gufatanya na perezida uriho cyangwa uzaza, no gufatanya n’abahagarariye abaturage muri Nteko Ishinga Amategeko mu gukemura impungenge zerekeranye n’iperereza ry’inzego za Leta Zunze Ubumwe z’Amerika ku ikoresha ry’ibiyobyabwenge byongera imbaraga.
Uruhare rwa Komite Mpuzamahanga y’Imikino Olempike rurimo gusuzumwa, kubera ko yemeye umwanzuro w’iperereza ry’Ubushinwa ryagaragaje ko abakinnyi boga 23 bahumanijwe n’imiti ivura umutima mu cyikoni cya Hoteli bari bacumbitsemo. Imidari 3 ya zahabu y’Abashinwa mu mikino y’i Tokyo yatwawe n’abakinnyi bari bakoresheje ibiyobyabwenge, ndetse bamwe bakaba bari muri muri yi ikino y’I Paris.
Ikirego gishobora gukurikiranwa mu mategeko yo mu rwego rw’igihugu ya Leta Zunze Ubumwe z’Amerika, bagendeye ku mategeko bitiriye inkotsa yasandaje ibyo gukoresha ibiyobyabwenge mu mikino y’itumba ya Sochi mu Burusiya muri 2014, ubwo Leta y’Uburusiya yahabwaga akato.
Komite Mpuzamahanga ya Olempike n’Akanama Mpuzamahanga Karwanya Gukoresha ibiyobyabwenge-ngufu, bimaze igihe bihatana ngo inzego zo mu rwego rw’ihihugu za Leta Zunze Ubumwe z’Amerika zitivanga mu gushoza imanza no gukurikirana ikoreshwa ry’ibiyobyabwenge-ngufu muri siporo kw’isi hose.
Salt Lake City yari yarigeze kwakira Imikino ya Olempike muri 2002. Ariko uko kwegurirwa imikino byaranzwe na ruswa, ku buryo Komite Mpuzamahanga y’Imikino ya Olempike yahise ikora ivugururwa ry’amategeko kugirango ikumire uwo muco wa ruswa.
Biri mu muco wo gutegura Imikino ya Olempike ko abayobozi b’imijyi n’ibihugu byifuza gukoresha iyo mikino iwabo baza kureshya Komite Mpuzamahanga ya Olempike barata ibigwi n’ubushobozi bwabyo.
Salt Lake City izaba ifite imyaka 10 yose yo kwitegura kwakira iyo mikino, ariko ntawamenya neza niba imihindagurikire y’igihe yateye niba izatuma haboneka urubura rw’amasimbi ruhagije kugirango iyo mikino ikenera ubunyere ibashe gukorwa.
Umujyi wa Salt Lake City wahisemo imikino muri 2034 kugirango inyungu zawo zitagongana n’iza Los Angeles izakira imikino Olempike yo mu mpeshyi muri 2028.
Bizaba bibaye ubwa 5 Leta Zunze Ubumwe z’Amerika zakiriye imikino Olempike y’itumba. Mbere y’iya Salt Lake City yo muri 2002, habayeho iya Lake Placid muri 1980 n’i 1932, na Squaw Valley muri 1960.
Forum