Perezida Joe Biden wa Leta zunze ubumwe z’Amerika yatangaje ko yafashe icyemezo cyo guhagarika umugambi wo kwiyamamaza nk’umukandida w’ishyaka ry’Abademokarate mu matora ateganijwe mu kwezi kwa cumi na kumwe.
Mw’itangazo yasohoye ku gicamunsi cyo ku cyumweru, yavuze ko n’ubwo yari afite umugambi wo kongera kwiyamamariza kuyobora Amerika, yemera ko kubera inyungu z’ishyaka rye n’inyungu z’igihugu akwiriye kubihagarika akibanda ku kubahiriza inshingano ze nk’umukuru w’igihugu mu minsi asigaje ya manda ye nka perezida.
Yandika ku rubuga rwa, X, Biden yasabye ishyaka rye ry’Abademokarate ko ryakwemeza Visi Perezida we, Kamala Harris, nk’umukandida uzarihagararira mu matora yo mu kwezi kwa cumi na kumwe.
Muri iri tangazo, yabanje kuvuga bimwe mu byo abona ko ubutegetsi bwe bumaze kugeraho mu myaka hafi ine amaze ayobora Amerika.
Ni ubwa mbere perezida uri ku butegetsi muri Amerika yikuye mu kwiyamariza manda ya kabiri.
Iki cyemezo kije gikurikira impungenge abatari bake mu ishyaka rye no hanze yaryo bagaragaje zerekeye ubukure bwe babona ko atagifite intege zihagije zo kuba yayobora Amerika mu yindi myaka ine iri imbere.
Perezida Biden yari aherutse gukora ikiganiro yizeza Abanyamerika ko agishoboye kandi aziyamamaza kuyobora indi manda. Ariko na nyuma yaho izo mpungenge zarakomeje. Abaherukaga kugaragaza izi mpungenge bo mu ishyaka rye harimo depite Nancy Pelosi wigeze kuyobora inteko ishinga amategeko y’Amerika na Perezida Barack Obama wigeze kuyobora iki gihugu.
Abasesengura ibya politiki y’Amerika baravuga ko iki cyemezo cya Biden w’imyaka 81 gishyize iherezo ku rugendo rw’imirimo ye ya politiki amazemo imyaka irenga 50.
Mu itangazo yasohoye, yavuze ko muri iki cyumweru azageza ijambo ku baturage b’Amerika ryerekeye iki cyemezo yafashe.
Hagati aho abo mu ishyaka ry’Abarepubulikani batangiye kumusaba kwegura. Prezida w’inteko ishinga amategeko Mike Johnson yanditse ku rubuga X avuga ko niba Biden yiyemerera ko atagishoboye kwiyamamaza, akwiye guhita asezera no ku butegetsi.
Profeseri Athanase Gahungu, umwalimu muri Kaminuza ya Chicago State muri Leta ya Illinois yavuganye n'Ijwi ry'Amerika atubwira uko yakiriye icyo cyemezo cya Prezida Biden, dore ko asanzwe ari umudemokarate.
Forum