Abanyapolitiki ba Leta Zunze Ubumwe z’Amerika ntibavuga rumwe ku mwanzuro w’Urubanza rushinja icyaha Trump.
Abantu bashagariye inzu z’urukiko rw’ubushinjacyaha ya Manhattan bategereje kureba uko imodoka zigagaye muri Donald Trump wahoze ari Perezida zinyuraho nyuma y’umwanzuro umushinja icyaha , Tariki ya 30,2024, i New York.
Umwanzuro w’akataraboneka ushinja icyaha Donald Trump wahoze ari Perezida wa Leta Zunze Ubumwe z’Amerika mu birego 34, kuri uyu wa kane mu rukiko rw’i New York, wateye ivuzivuzi rya bwangu mu banyapolitiki ba Leta Zunze Ubumwe z’Amerika.
Uwo bahanganye mu matora akaba ari nawe mu kandida w‘ishyaka ry’Abademokrate, Perezida Joe Biden, yatangaje ko kuba urukiko rw’I New York rwafashe umwanzuro wo gushinja icyaha uwahoze ari Perezida bigaragaza ko nta muntu numwe uri hejuru y’amategeko.
Mu nyandiko byashyize ahagaragara, ibiro bishinzwe kwiyamamaza kwa Biden na Harris byagize biti: “Donald Trump yakomeje kwibeshya akekako guca ku mategeko kubera inyungu ze bwite bitazagira ingaruka”. Biti: “Ariko umwanzuro w’urubanza rw’uyu munsi ntacyo uhindura kubyo Abanyamerika basanzwe bazi. Uburyo busigaye bwo gukumira Trump ngo adakoza ikirenge mu ngoro ya Perezida buroroshye: ni mu matora”
Ifoto ya Matolewo y’urubanza rwa Donald Trump wahoze ari Perezida, Tariki 30 z’ukwa 5, 2024, nyuma y’uko ubucamanza bumushinja ibyaha byo gufindafinda impampuro z’ubucungamali mu mugambi unyuranye n’amategeko wo kugoreka amatora yo muri 2016.
Ibiro bishinzwe kwiyamamaza kwa Trump mu nyandiko byashyize ahagaragara biravuga ko Trump nta butabera yahawe mu rubanza rwe, bigatangaza cyane kuba bibera muri kamwe mu turere tw’igihugu twemera cyane uburenganzira bw’abaturage. Mw’itangazo mbwirwaruhame, Trump yagize ati: “Ibi ni urukozasoni. Uru rubanza rwajemo uburiganya butewe n’umucamanza utari indakemwa. Ni urubanza rurimo uburiganya, ni urukozasoni. Bagombye kuba baraduhaye ahandi rusomerwa. Hano twari 5 kw’i 100, cyangwa 6 kw’i 100 muri aka kagari, muri aka karere. Uru ni urubanza rufifitse, ruteye isoni”.
Umuvugizi w’Inteko Ishinga Amategeko Mike Johnson, akaba umwe mu bari kw’isonga ry’ishyaka ry’Abarepublikani we yagize ati: “Uyu munsi uzahora wibukwa nk’umunsi w’urukozasoni mu mateka ya Leta Zunze Ubumwe z’Amerika. Abademokrate barimo kuvuza impundu mu gihe uhagarariye ishyaka bahanganye yarimo gucirirwa urubanza ku birego bya nyirarureshwa, barata ubuhamya bw’igisambo cy’umwunganizi mu mategeko cyatswe impapuro kikanafungwa. Ibi byakozwe ni politiki ntaho bihuriye n’ubutabera.”
Imbaraga z’Ubucamanza
Abademokrate bo mu nteko Ishinga Amategeko bavuze ko urubanza rugaragaza imbaraga z’ubucamanza bwa Leta Zunze Ubumwe z’Amerika.
Uko abantu bakiriye gukata urubanza rwa Donald Trump, wahoze ari Perezida, imbere y’Urukiko Nshinjacyaha rwa Manhattan, Tariki ya 30 z.ukwa 5,2024, i New York.
Senateri w’Umudemokrate Sheldon Whitehouse, uyobora akanama gashinzwe inkiko muri Senat ya Leta Zunze Ubumwe z’Amerika yagize ati: “Umuntu ibirego 34 bihama kandi akaba atemera na busa ubuyobozi bugendera ku mategeko ntabwo abereye kuyobora igihugu cy’ingenzi cyane kw’isi.” Yungamo ati: “Mu rukiko honyine kubera ko hakoresha ukuri niho honyine uwahoze ari Perezida yananiwe kubeshya no gukoresha iterabwoba kugirango yivane mu makuba. Abanyamerika bafite impamvu yo kwizera urukiko”.
Bibaye ubwa mbere mu mateka uwabaye Perezida wa Leta Zunze Ubumwe z’Amerika ashinjwa icyaha kijyana n’igifungo. Umwanzuro w’urukiko ariko ntubuza Trump gukomeza kwiyamamariza umwanya wa Perezida, ndetse n’imanza z’ubujurire zishobora kumara igihe kirekire.
Barbara Perry, umwe mu bashinzwe gahunda y‘amasomo y’Amateka Atanditse y’Abaperezida mu kigo cyitiriwe Miller cya Kaminuza ya Virginia, yabwiye Ijwi ry’Amerika ko Trump aramutse ajuriye agatsindwa byaba ari indi ntera nshyashya mu mateka y’Umuperezida wa Leta Zunze Ubumwe z’Amerika
Abisobanura agira ati: “Tuvuge wenda ko igihano cyo kuba yafungwa kigumyeho kugeza tariki 5 z’ukwezi kwa 11, umunsi w’amatora ya Perezida wa Amerika. Birashoboka ko aramutse akomeje gutura muri Leta ya Florida, Leta itemerera abakoze icyaha gifungisha kuba batora, ibyo bivuga ko na Trump ubwe ataba yemerewe kwitora. Aho ibintu bitangaje cyane, uretse no kuba ari ibintu bitigeze bibaho… nuko we n’abandi banyapolitiki b’Abarepublikani muri iyi myaka ishize bakomeje kugerageza kuburizamo amajwi y’abaturage.”
Trump ashobora nanone gukatirwa igifungo cyangwa agafungishwa ijisho iwe mu rugo ibirego biramutse bikomeje kumuhama.
Abashyigikiye Donald Trump baragaragaza uko bakiriye umwanzuro w’urukiko ushinja icyaha uwahoze ari Perezida, hanze y’Urukiko Nshinjacyaha rwa Manhattan, Tariki 30 z’ukwa 5, 2024, i New York.
Senateri Lindsey Graham w’umurepublikani mw’itangazo yashyize ahagaragara yashyize mu majwi urubanza n’ukuntu rwaje gusozwa no gushinja Trump.
Graham yagize ati: “Umushinjacyaha w’igisuma mu bya politiki yacuze ibirego ari muri hamwe mu hantu hakomeye mu gihugu mu kurengera uburenganzira bw’abaturage. Umucamanza kidobya kandi ubogamye wagombye kuba yaragijweyo aza kuyobora urubanza mu buryo agusha icyaha kuri Trump. Abacamanza bose bakomoka muri kamwe mu turere twa Leta Zunze Ubumwe z’Amerika twemera cyane uburenganzira bw’umuturage.”
Perry yahakanye ibirego by’Abarepublikani bavuga ko urubanza rwabaye ikinamico.
Yagize ati: “Benshi mu babikurikiraniye hafi bavugishije ukuri bakwemeza ko urubanza rwaranzwe n’ubutabera. Wenda baramutse baketse ko Umucamanza yabogamye, ese bose uko ari 12 n’abamwungirije bari bubogame? Ese bakeka ko bose bari babogamiye hamwe?” Ndetse yunzemo ati: “Abantu 12 bose baburanishije urubanza bemeranijweho n’impande zombi zihanganye muri uru rubanza, none kugirango umuntu avuge ngo ubucamanza bwacu ni ikinamico, njye mbona ibyo rwose bigeze bimeze nk’ubugambanyi.”
Umuvugizi w’Umujyanama mu by’Amategeko mu biro bya Perezida wa Leta Zunze Ubumwe z’Amerika, Ian Sams yagize ati: “Twe twubaha ubuyobozi bugendera ku mategeko, nkaba rero nta kindi nakongeraho.” Ibiro bya Perezida wa Leta Zunze Ubumwe z’Amerika ntacyo birasubiza Ijwi ry’Amerika ku kibazo twabajije niba biteguye ko umwanzuro w’urubanza warushaho gutera amakimbirane.
Donald Trump afite ibindi birego by’ubushinjacyaha agomba guhangana nabyo muri leta ya Floridana Georgia, ndetse no mu mujyi wa Washington.
Forum