Ingabo z’Ubuhinde zirwanira mu mazi zirimo n’abakomando zafashe ubwato bwari bwarigaruriwe n’abashimusi b’Abanyasomaliya. Zabohoje abantu 17 nkuko byatangajwe n’umuvugizi wazo ejo kuwa gatandatu.
Yatangaje ku rubuga X ko abo bashimusi bose uko ari 35 bari muri ubwo bwato barambitse hasi intwaro bakishyira mu maboko y’ingabo z’Ubuhinde.
Zasatse kandi muri ubwo bwato bwitwa Ruen butwara ibicuruzwa, zisanga nta ntwaro butwaye ku buryo butemewe n’amategeko.
Aba basirikare barwanira mu mazi batangaje ko kuwa gatanu w’icyumweru gishize ari bwo babohoje ubu bwato bwashimuswe umwaka ushize.
Bushobora kuba bwarakoreshejwe n’aba bashimusi nk’indiri yo gushimuta ubundi bukomoka mu gihugu cya Bangladesh bwari buhagurutse ku cyambu cya Somaliya mu ntangiriro z’icyumweru gishize nkuko byatangajwe n’ingabo z’umuryango w’Ubumwe bw’Uburayi zirwanira mu mazi.
Ishimutwa ry’Ubwato Ruen ryabaye irya mbere rikozwe n’abashimusi b’Abanyasomaliya kuva mu 2017 ubwo ingabo z’amahanga zirwanira mu mazi zishyiraga hamwe zigahagaraka ubushimusi bw’amato anyura mu kigobe cya Aden no mu nyanja y’Ubuhinde.
Abashimusi b’Abanyasomali bamaze imyaka 10 bateza umutekano muke ku mato anyura muri iyo nyanja ariko bari baracishije make, bongera kubura umutwe mu mwaka ushize.
Ubuhinde bugaba ingabo zirwanira mu mazi mu mato byibuze 12 y’intambara mu rwego rwo kurwanya abashimusi. Ni mu gihe ingabo z’Uburayi n’Amerika ziri muri aka gace zo zita ku kurwanya Abahuti bo muri Yemeni bashyigikiwe na Irani.
Kuva mu kwezi kwa cumi n’abiri taliki ya mbere, abashimusi bamaze kugerageza kwigarurira amato inshuro byibuze 17 nkuko byemezwa n’ingabo z’Ubuhinde.
Forum