Igitero cy’akadege ka Drone ku modoka mu mujyi wa Baghdad, umurwa mukuru wa Iraki cyahitanye abarwanyi babiri b’umutwe w’intagondwa ushyigikiwe na Irani, nk’uko amakuru ava mu nzego z’umutekano abitangaza.
Ibi bibaye mu gihe Leta zunze ubumwe z’Amerika ikomeje kongera ibitero ku mitwe y’abarwanyi bashyigikiwe na Irani muri Iraki na Siriya. Birakurikira ibitero umutwe wa Hamas wagabye kuri Isiraheri mu kwezi kwa 10 umwaka, ushize.
Umwe mu bishwe mu bitero mu mujyi wa Baghdad n’umuyobozi wa Kataeb Hezbollah, umutwe ushinzwe ibikorwa bya gisirikari muri Siriya. Byemejwe n’umwe muri abo barwanyi wavuganye n’ibiro ntaramakuru by’Abafransa, AFP.
Uyu avuga ko uwo muyobozi wishwe ari Abu Baqr al-Saadi.
Kugeza ubu ariko nta mutwe wari wigamba icyo gitero. Gusa kibaye nyuma y’ibindi byinshi Amerika imaze iminsi igaba ku barwanyi bashyigikiwe na Irani muri Iraki na Siriya.
Amerika ivuga ko imaze kugabwaho ibitero bigera ku 165, kuva Hamas igabye ibitero kuri Isiraheri.Amerika ifata umutwe wa Kataeb Hezbollah nk’umutwe w’iterabwoba wagize uruhare ku gitero cyahitanye abasirikari b’Amerika muri Yorudaniya.
Mu mpera z’ukwezi kwa mbere, uyu mutwe wari watangaje ko wahagaritse ibitero ku ngabo z’Amerika.
Forum