Kotedivuwari na Nijeriya Muri Finale y'Igikombe cy'Afrika cy'Ibihugu CAN

Ikipe ya Kotedivuwari ikinira iwabo yamaze kubona tike yo kuzakina umukino wa nyuma w'igikombe cy'Afrika cy'ibihugu CAN 2023.

Ni nyuma yo gutsinda Repubulika ya Demokarasi ya Kongo igitego 1-0. Ni igitego cyabonetse ku munota wa 65 gitsinzwe n'umukinnyi Sebastien Haller usanzwe ukinira ikipe ya Borussia Dortmund muri shampiyona y'Ubudage.

Kotedivuwari imaze gutsinda igikombe cy'Afrika inshuro ebyiri ibaye igihugu cya mbere cyakiriye imikino kigeze ku mukino wa nyuma kuva Misiri yakira iyi mikino mu 2006.

Kotedivuwari izahura ku mukino wa nyuma na Nijeriya yasezereye Afrika y'epfo muri za penaliti nyuma yuko iminota 120 y'umukino irangiye amakipe anganya igitego 1-1.

Nijeriya yaje kwinjiza penalti 4 kuri 2 z'Afrika y'epfo.