Ihuriro rishyigikiye umukandida Khalifa Sall wiyamamariza umwanya wa perezida muri Senegali kuri uyu wa gatandatu, ryatangaje ko ridashyigikiye ko amatora ateganijwe taliki 25 z’uku kwezi yigizwa inyuma. Byari byasabwe n’irindi shyaka rivuga ko ritizeye ubuziranenge bw’imigendekere yayo.
Ishyaka Senegalese Democratic Party (PDS), ryasabye ko amatora yigizwayo nyuma y’uko mu kwezi gushize umukandida waryo akuwe ku rutonde rw’abazatorwa. Ubwo busabe bwatanzwe ku wa gatanu mu gihe hasigaye ibyumweru birenga bitatu ngo amatora abe.
Mu buryo butari bwitezwe, televiziyo ya leta yatangaje ko Perezida Macky Sall ari buvuge ijambo saa sita ku isaaha mpuzamahanga. Macky Sall nta sano iyo ari yo yose afitanye na Khalifa Sall. Kuva bitangajwe abantu batangiye gukeka ko ryaba rirebana n’ikibazo cyo kwigiza inyuma amatora.
Ihuriro riyobowe na Khalifa Sall ryasohoye itangazo rivuga ko gutinza amatora bishobora gutuma ubuziranenge bwayo bukemangwa ndetse bikaba byakwitwa kwambura inzego ububasha hakoreshejwe igitugu.
Iryo tangazo rivuga ko kwigiza inyuma amatora byatera igihugu kujegajega muri politike bikaba byashora Senegali mu bihe bidasanzwe biherekejwe n’ingaruka mbi cyane. Bityo, iri tangazo rihamagarira andi mashyaka kwanga ko amatora yigizwa inyuma.
Senegali ntirigera yigiza inyuma gahunda y’amatora y’umukuru w’igihugu. Kuva mu 1960 ibonye ubwigenge nyuma yo gukolonizwa n’Ubufaransa, inshuro enye zose habayeho ihererekanya bubasha hagati y’abakuru b’ibihugu, byakozwe mu mahoro. Yari yariyubakiye izina nka kimwe mu bihugu byo muri Afurika y’uburengerazuba birangwa na demokarasi ihamye.
Ihuriro ry’abakuru b’amadini barimo Abakirisitu n’Abayisilamu bo muri Senegali na bo bagaragaje ko kwigiza inyuma amatora bishobora guteza ingorane basaba Perezida Sall gufata ingamba zigamije kwirinda umutekano muke.
Forum