Abaturage mu mujyi muto wa Sake uri muri teritware ya Masisi muri Kivu ya ruguru, barasaba ko ingabo z'Uburundi ziri mu butumwa bw'umuryango w'Afurika y'Iburasirazuba (EAC) zisubira mu gihugu cyazo.
Barazishinja kuba zikorana n’abarwanyi b'umutwe wa M23 mu teritware ya Masisi.
Ubu busabe buje nyuma yy'ubushyamirane hagati y'ingabo z'Uburundi n’abarwanyi bibumbiye kitwa Wazalendu bashyigikiwe na Leta ya Kongo. Abo ni abavuye mu mitwe ya Nyatura na Mai-Mai, ari na bo barinda uyu mujyi muto wa Sake, uri muri grupema ya Kamuronza, sheferi ya Bahunde.
Ibi byabaye ku wa Kabiri. Amakuru Ijwi ry'Amerika rifite agaragaza ko hapfuye umunty umwe abandi umunani barakomereka.
Aha muri uyu mujyi muri Sake abari basanzwe bafite amaduka,na za butiki ku muhanda mugari ntibigeze bakingura imiryango yabo batinya ko ibyabaye mw’ijoro, bishobora kongera.
Abaturage Ijwi ry’Amerika ryaganiriye nabo barashinja ingabo za EAC kuba zikorana bya hafi n’inyeshyamba z’umutwe wa M23. Bavuga ko batagishaka no kubona imodokari zabo mu teritware ya Masisi.
Mwisha Busanga Leopold uhagarariye sosiyete sivile muri grupema ya Kiamuronza avuga iki atari cyo gihe cyo kwamagana ingabo za EAC kuko zigifite byinshi byo gukorera abaturiye teritware ya Masisi.
Mu kiganiro kigufi yagiranye n'Ijwi ry’Amerika, Kapiteni Nsabimana Norbert umuvugizi w’ingabo z’Uburundi mu burasirazuba bwa Kongo, yemeje ko muri uku gushyamirana umusirikare wabo yahakomerekeye.
Yongeraho ko nubwo ibi byababaye, icyo bashyize imbere ari ukugarura amahoro no kurinda umutekeno w’abanyagihugu bari mu kaga.
Kugeza ubu ntacyo igisirikare cya Kongo FARDC kiravuga ku byerekeye uko gukozanyaho.
Facebook Forum