Irani Yarezwe mu Rukiko Mpuzamahanga Ku ndege Ya Ukraine Yahanuye mu 2020

Ibihugu bine byishyize hamwe birega Irani mu Rukiko Mpuzamahanga rw’Ubutabera ku ndege y’abagenzi ya Ukraine Irani yahanuye mu 2020.

Ibyo bihugu ni Ubwongereza, Canada, Suwede, na Ukraine. Birasaba CIJ, Urukiko rw’Umuryango w’Abibumbye - ONU, rukorera i La Haye mu Buholandi, kwemeza ko Irani yarashe indege ya Ukraine mu buryo bunyuranyije n’amategeko, no kuyitegeka gusaba imbabazi no guha indishyi imiryango y’abayiguyemo.

Ku itariki ya 8 y’ukwa mbere 2020, indege nimero PS752 yahagurutse i Teherani muri Irani yerekeza i Kiev muri Ukraine. Ikigera mu kirere, abasirikare ba Irani barayirashe, irahanuka. Abari bayirimo, abagenzi, abakozi bayo n’abaderevu bayo, bose barapfuye. Bari 176. Bakomokaga muri Canada, Ubwongereza, Suwede, Ukraine, Afuganistani, na Irani. Umuto muri bo yari afite umwaka umwe w’amavuko, naho umukuru muri bose yari afite 74.

Icyo gihe, leta ya Irani yatangaje ko kuyihanura “ari ishyano ryo kuyibeshyaho.” Ngo “abasirikare bayo baketse ko ari misile Amerika iboherejeho.”

Mu itangazo rimwe biriya bihugu bine byashyize ku mugaragaro, bivuga ko bishaka, mu izina ry’imiryango y’abaguye mu ndege, “kumenya ukuri, ubutabera, no kubiryoza abarashe indege PS752 ya Ukraine.