Ingabo za Sudani, uyu munsi kuwa gatatu zahagaritse ibiganiro zagiranaga n’umutwe witwara gisilikare zihanganye nawo kw’ihagarikwa ry’imirwano no bijyanye no kureka infashanyo igatambuka.
Ayo makuru yaturutse mu rwego rwa diplomasi, yabyukije ubwoba bw’uko ubushyamirane bumaze ibyumweru bitandatu, bwazaroha igihugu cya gatatu mu bunini cy’Afurika, mu bibazo bikomeye byugarije ikiremwa muntu.
Imishyikirano n’umutwe wa Rapid Support Forces (RSF) yatangiye mu ntangiriro z’uku kwezi kwa gatanu, yari yavuyemo itangazo ryo kwiyemeza kurinda abasivili no guhagarika imirwano by’igihe gito (byemeranijweho incuro ebyiri). Gusa, ayo masezerano yose yagiye atubahirizwa.
Kugeza mw’ijoro ry’ejo kuwa kabiri, abaturage bavugaga ko ubushyamirane bukaze mu majyepfo y’umujyi wa Khartoum n’uwa Omdurman hakurya y’uruzi rwa Nile.
Ingabo z’igihugu, zishingikirije ku bushobozi bwo mu kirere n’ubwo kurasira ku butaka. Ku ruhande rwayo, RSF, ifite intwaro zoroheje, ariko ikomeye mu rugamba rwayo mu mihanda y’i Khartoum, yari yemeye kwongera ku cyumweru cy’amasezerano y’ihagarika imirwano, iminsi itanu, hasigaye igihe gito ngo ayo masezerano arangire ku wa Mbere.
Umukuru w’ingabo, Jenerali Abdel Fattah al-Burhan, na Jenerali Mohamed Hamdan Dagalo, umukuru wa RSF, uzwi kw’izina rya Hemedti, bahanganye kuva kw’itariki ya 15 y’ukwezi gushize kwa kane. Nta n’umwe biboneka ko yaba ashaka kuva kw’izima. (Reuters)
Facebook Forum