Muri shampiyona y'umupira w'amaguru mu kiciro cya mbere mu Rwanda, ku munsi wa 14 w'imikino, ikipe ya APR FC yatsinze mukeba wayo Rayon Sport igitego 1 ku busa kuri Stade ya Kigali i Nyamirambo. Icyo gitego kinjijwe na Yannick Bizimana ku munota wa 73.
Ejo Ku wa gatandatu naho, habaye imikino 6: Kiyovu Sport yatsinze Rwamagana City ibitego 2 kuri 1 kuri Stade y'i Ngoma. Kuri Stade Huye i Butare Mukura Victory Sport yatsinze Police FC igitego 1 ku busa. Etincelles FC yatsinze Espoir FC ibitego 2 ku busa kuri Stade Kamarampaka i Rusizi.
Kuri Stade Ubworoherane i Musanze, ikipe ya Musanze FC yanganyije na Bugesera FC ubusa ku busa. Gasogi United yatsinze Rutsiro FC igitego 1 ku busa kuri Stade Umuganda i Rubavu.
Ku wa gatanu habaye imikino ibiri: kuri Stade ya Kigali i Nyamirambo, AS Kigali yatsinze Gorilla FC igitego 1 ku busa na ho Marines FC inganya na Sunrise ibitego 2 kuri 2 kuri Stade Umuganda i Rubavu.
Nyuma y'uko buri kipe imaze gukina imikino 14, ku rutonde rw'agateganyo rwa shampiyona y'umupira w'amaguru mu kiciro cya mbere mu Rwanda, amakipe akurikirana kuri ubu buryo :
1.AS Kigali ifite amanota 30
2.Rayon Sport 28
3.APR FC 27
4.Kiyovu Sport 27
5.Gasogi United 25
6.Etincelles FC 22
7.Musanze FC 21
8.Mukura Victory Sport 20
9.Police FC 20
10.Sunrise 19
11.Bugesera FC 18
12.Gorilla FC 18
13.Rutsiro FC 10
14.Rwamagana City 10
15.Marines FC 7
16.Espoir FC 7
Ino nkuru yateguwe n'umunyamakuru w'Ijwi ry'Amerika, Jean Claude Munyandinda.
Facebook Forum