Umukandida mu matora y'umukuru w'igihugu muri Kenya, Raila Odinga yanze amajwi yavuye mw’itora rya perezida ryo kw’italiki ya 9 y’uku kwezi kwa munani, avuga ko ayo majwi nta gaciro afite imbere y’amategeko.
Komisiyo y’amatora kuri uyu wa mbere yari yatangaje ko William Ruto ari we watsinze ayo matora.
Odinga avuga ko demokarasi ya Kenya yugarijwe n’ibibazo mu rwego rw’amategeko ku gihe kirekire. Ni nyuma y’uko bitangajwe ko yatsinzwe muri iryo tora.
Ibya mbere Odinga yavuze ku majwi yavuye mw’itora, bije igihe gito nyuma y’uko abakomiseri bane muri barindwi b’itora, bavuze ko bagihagaze ku cyemezo cyabo cyo ku munsi umwe mbere yaho, cyo kwanga amajwi yavuye mw’itora rya Perezida, aho bavuze ko iteranywa ry’amajwi ya nyuma ryari ritwikiriwe “n’igihu”
Odinga wagerageje incuro ya gatanu kugera ku mwanya wa perezida, yabwiye abanyamakuru ati: “Uko tubibona imibare yatangajwe n’umuyobozi wa komisiyo y’amatora, Wafula Chebukati twasanze atemewe n’amategeko. Agomba guseswa n’urukiko. Ati: “Ibyo twabonye ejo ni agahomamunwa. Reka ntihagire ufata ubutabera mu biganza bye.”
Chebukati yatangaje ko visi perezida uriho ubu, William Roto, ari we watsinze kuwa mbere na 50.49 kw’ijana by’amajwi, atsinze Odinga wagize 48.5 kw’ijana. Iminota mike mbere y’aho, uwari wungirije Chebukati, Julianna Cherera yari yabwiye itangazamakuru ahandi babonaniye, ko we n’abandi bakomiseri batatu bitandukanyije n’amajwi yavuye mw’itora.
Itsinda ryavuganye na Cherera kuri uyu wa kabiri, yaribwiye ko amajwi yatumye Ruto aza imbere gato mu ntsinzi, yarimo ikosa kandi ashinja Chebukati kuba yarabasumbije ijwi ku bibazo byabo ku majwi ya nyuma yateranyijwe. Cyakora yavuze ko amatora yakozwe mu nzira iboneye.
Chebukati n’abo bakomiseri bane, ntibasubije ibiro ntaramakuru byo mu Bwongereza, Reuters ubwo bari basabwe kugira icyo bavuga.
Mw’ijambo rye, Odinga yasabye abayoboke be, kubumbatira umutuzo, bakubaha itegeko, aho kurifata mu biganza byabo.
Facebook Forum