Abantu babarirwa mu magana babyukiye mu myigaragambyo i Tunis muri Tuniziya kuri iki cyumweru, mu munsi wa kabiri w’imyigaragambyo bamagana amatora yo guhindura Itegeko Nshinga yahamagajwe na perezida Kais Saied.
Abatavuga rumwe n’ubutegetsi bwe baravuga ko aya matora agamije kumugumisha ku butegetsi ubuziraherezo.
Iyi myigaragambyo yahamagajwe na n’ihuriro rya Salvation Front ry'abatavuga rumwe n’ubutegetsi bwe harimo ishyaka Ennahda rya Kisilamu ryiganje mu Nteko Ishinga Amategeko Kais Saied yasheshe mu kwezi kwa gatatu.
Ejo ku wa gatandatu, hari indi myigaragambyo yateguwe n’ishyaka riharanira ubusugire bw’Itegeko Nshinga na yo yamagana ayo matora yo kurivugurura. Ku wa kane hari habaye indi myigaragambyo y’abahuriye mu rugaga rw’abakozi yamagana amavugurura ya leta mu by’ubukungu.
Abashyigikiye perezida baravuga ko yahagurukiye kurwanya imbaraga z’agatsiko k’impuguke zamunzwe na ruswa bavuga ko yazahaje Tuniziya mu rwego rw’ubukungu n’u rwa politike mu myaka 10 ishize.
Facebook Forum